Kabeldiewe maak weer amok
Kabeldiewe is weer opnuut bedrywig in die Mosselbaai-omgewing. Volgens die jongste inligting ontvang van die Da Gamaskoppolisie, is daar sedert 22 Julie en 2 September minstens vier sake van kabeldiefstal aanhangig gemaak, waarin ongeveer 4km van Telkom se oorhoofse kabels gesteel is.
Die plekke waar kabeldiefstal plaasgevind sluit in die R328 na Oudsthoorn, tussen die Welbedag- en Matjiesdrift-afdraaipaaie; die Aalwyndal-pad tussen Louis Fourieweg en die Mosselbaai-vliegveld; die R328 tussen Hartenbos Heuwels en Sonskynvallei, asook die pad tussen Dibiki-oord en die Hartenbosrivieroord.
Volgens die Da Gamaskop-polisie, word die kabels teen die pale afgeknip. Nadat dit op die grond geval het, word dit in die veld skoongemaak en weggeneem.
Die koperdraad word vermoedelik skoongebrand
“Skroothandelaars mag nie gebrande koperdraad aankoop of daarmee handeldryf nie. Daar word opnuut ‘n beroep op die publiek gedoen om enige verdagte aktiwiteite te rapporteer. Ons vermoed egter dat hierdie kabels nie plaaslik nie, maar elders verkoop word,” sê kapt Wollie Fourie, kommunikasiebeampte van die Da Gamaskop- polisie. Alhoewel leidrade opgevolg word, is daar nog geen verdagtes in hegtenis geneem nie.
Die geskatte waarde van die kabels wat tot dusver tydens hierdie voorvalle gesteel is, is R500 000, aldus kapt Fourie.
Persone wat hulle aan hierdie diefstal skuldig maak kan ook in terme van die Wysigingswet op Strafregtelike Aangeleenthede (Wet 18 van 2015). Hierdie wet het op 1 Junie 2016 in werking getree.
Hierdie Wet verseker dat daar strenger voorwaardes opgelê word vir die toekenning van borgtog ten opsigte van noodsaaklike infrastruktuurverwante oortredings. Daar word ook voorsiening gemaak vir die oplegging van strenger vonnisse aan oortreders.
Die Wet word beskou as ‘n tydige instrument om toenemende dade van vandalisme en diefstal van infrastruktuur te hanteer.
Enige persoon met inligting aangaande kabeldiefstal of verdagte aktiwiteite, kontak ao Thinus Newman (044 606 2240).