Mosselbaai se bekende mini-akwarium by die Punt verspoel
Die bekende Shark Lab, Mosselbaai se eie mini-akwarium, by die Punt het die afgelope tyd baie skade gehad nadat rowwe seetoestande en uitermate hoë deinings twee maal in ‘n kort tydperk, deur die akwarium gespoel het. Die Shark Lab dien as ‘n opvoedkundige sentrum waar toeriste en skoolgroepe die marienelewe van naderby kan sien. Daar kan ook saam met hondhaaie geswem word om die publiek bewus te maak daarvan dat nie alle haaie gevaarlik is nie.
Die personeel van die Shark Lab gee ook graag raad aan vistenkeienaars en daar word ook visspesies hier gerehabiliteer. As gevolg van die ligging reg by die see, is die personeel ook opgelei om beseerde seevoëls te ontvang vanwaar hulle na SAPREC (Seabird and Penguin Rehabilitation Centre) geneem word. Indien daar Kaapse pelsrobbe op die rotse rus, word hulle ook gemonitor. Dit is belangrik dat hierdie mini-akwarium behoue bly om sy opvoedkundige rol te vervul.