Met dapper en stapper vir borskanker
Begin jou kuite strek, jou tone te krul en wikkel jou lyf. Hier kom ‘n ding, want dit is weer tyd vir Kansa se borskankerstap. Vanjaar vind die stappery plaas op Woensdag, 11 Oktober om 18:00 by die Langeberg Mall.
Almal kan deelneem en dit is die ideale geleentheid vir besighede en organisasies om hul ondersteuning te wys vir die stryd teen kanker en bietjie span te bou. Die sowat 5km-roete is maklik en toeganklik vir alle deelnemers en dit is rolstoelvriendelik. Die sirkelroete rondom die sentrum word twee keer gestap.
Registrasie vind reeds vanaf 17:00 plaas en diegene wat graag reeds per e-pos wil registreer, kan e-pos stuur aan Lucinda Viljoen by lucinda@cansa.org.za
Die verrigtinge gaan om sowat 19:30 afgehandel wees. Kostes beloop R40 per volwassene en R15 vir kinders onder 16 jaar.
Enige organisasies of besighede wat graag van hierdie geleentheid gebruik wil maak vir bemarkingsdoeleindes, kontak Lucinda Viljoen (082 663 3529).