Selfoondiefstal ‘n ernstige tendens
Onder die etlike sake aangemeld by polisiestasies in Mosselbaai na afloop van die naweek, is selfoondiefstal onder die mees algemene.
Sake wat aangemeld is by die Da Gamaskop-polisiestasie sluit in 'n voorval by die D'Almeida-kliniek waartydens 'n geneeskundige sy selfoon vir 'n paar oomblikke neergesit het om 'n pasiënt te roep en met sy terugkeer, was die foon weg.
In 'n ander voorval, het 'n man glo naby die polisiestasie op 'n saamrygeleentheid gewag met sy selfoon in die hand, toe 'n verdagte dit by hom afgeneem en daarmee weggehardloop het.
In ander voorvalle, soos ook aangemeld by die KwaNonqaba-polisiestasie, word voetgangers laataand onderweg vanaf kuierplekke van hulle selfone en ander waardevolle items beroof.
"Moenie jou selfoon êrens neersit, selfs net vir 'n oomblik nie. Moet dit nooit openlik vertoon nie. Self in jou broeksak, kan 'n selfoon se liggie 'n lokaas wees vir kriminele elemente," sê kapt Wollie Fourie, kommunikasiebeampte van die Da Gamaskop-polisie.
"'n Mens kan jouself afvra of jy 'n R200noot openlik êrens sal laat lê. Waarom dit met 'n selfoon, wat veel meer werd is doen?"