Verdagte in aanhouding na roof en aanranding
'n Verdagte (33) het op Maandag, 16 April in die Mosselbaai-landdroshof verskyn in verband met die roof en aanranding van 'n bejaarde inwoner by sy huis in Ryk Tulbachstraat in Da Nova twee weke gelede.
Volgens die Mosselbaai-polisiestasie se woordvoerder, ao Pieter Koekemoer is die slagoffer met 'n stomp voorwerp aangerand en het hy kopbeserings opgedoen.
Die voorval het om ongeveer 07:30 gebeur. 'n Op en wakker buurman het die verdagte met gesteelde goedere by die erf sien uithardloop en 'n boodskap op die plaaslike buurtwag se WhatsApp-groep gelos. Die sekuriteitsmaatskappy, ADT was binne drie minute op die toneel waarna die Mosselbaai-polisie en die provinsiale verkeer oor die voorval ingelig is.
Die Mosselbaai-polisie het die voorval ondersoek en verskeie leidrade opgevolg. "Ons span het saamgewerk om die verdagte vas te trek," sê ao Koekemoer. Die saak is uitgestel na 23 Julie en die verdagte bly in aanhouding.