Winterliga-atletiek begin
Die sukses van die winterligaatletiekbyeenkomste die afgelope twee jaar, het daartoe gelei dat die byeenkomste op 25 April weer by die Van Riebeeck-stadion begin.
Die inisiatief is van stapel gestuur om atlete die geleentheid te bied om aan byeenkomste deel te neem vanweë ‘n groot aanvraag daarna in die SWD-streek. Die byeenkomste in die wintermaande, dien dan ook as voorbereiding vir die komende atletiekseisoen. Boonop het die sukses van atlete wat aan die 2017-winterliga deelgeneem het, vanjaar duidelik in hulle prestasie gewys.Die liga is oop vir alle atlete en byeenkomste vind elke tweede Woensdag tussen 17:00 en 19:00 by die stadion plaas. Die inskrywingsfooi is R35 per atleet per byeenkoms. Atlete kan aan alle items op die program deelneem. Daar word meegeding in verskeie baanitems, verspring, hoogspring, gewigstoot en spiesgooi. Pryse vir atlete met besondere prestasies, sal weekliks uitgedeel word.
Bianca Janse van Rensburg wat met hierdie inisiatief begin het, het intussen ‘n pos in Kaapstad aanvaar en Eden Athlete Management Services het die geleentheid aangegryp om betrokke te raak.
Kontak hulle vir meer inligting (083 265 0798).