Afdankings in eerste burger se kantoor
Terwyl daar etlike vrae rondom die vroeë beëindiging van kontrakte van twee amptenare in die kantoor van die burgemeester hang is daar aanduidings dat die afdankings moontlik net die oortjies van ‘n seekoei mag wees.
Die Oudtshoorn Courant het reeds twee weke gelede inligting ontvang dat Elrico van Rooyen en Deon Britz se kontrakte as onderskeidelik kantoorbestuurder en kommunikasiebeampte van die burgemeester se kantoor, beëindig is.
In reaksie op ‘n navraag op 28 Mei het Allen Paulse, munisipale bestuurder, die afdankings bevestig, maar wou nie redes verstrek nie.
“Dit is korrek dat twee munisipale amptenare uit diens gestel is deur die munisipaliteit. Arbeidsaangeleenthede tussen werkgewer en werknemer is ‘n vertroulike aangeleentheid en besonderhede van enige diensbeëindiging word as reël nie bekend gemaak aan eksterne instansieS of individue nie. Die munisipaliteit ontslaan op ‘n gereëlde basis werknemers na interne prosesse en die redes en name word as ’n reël ook nie aan eksterne partye bekend gemaak nie.”
Die Oudtshoorn Courant het die navraag weer gestuur en gemeld dat die aanstellings volgens alle aanduidings politieke aanstellings was en dat dit as sulks in openbare belang is om die omstandighede rondom die summiere beëindiging van kontrakte bekend te maak.
Daar is egter by die oorspronklike reaksie volstaan.
Volgens vertroulike inligting wat bekom is, sou die twee se tydelike kontrakte op 31 Mei beëindig word. Die burgemeester het egter die munisipale bestuurder meegedeel dat ten spyte daarvan dat die kontrakte einde Mei moes eindig, die twee amptenare as gevolg van onreëlmatighede met onmiddellike effek uit hul poste onthef moes word.
Die pos waarin Van Rooyen aangestel was, is reeds meer as een keer geadverteer. Alhoewel die munisipaliteit nie bereid is om op die saak uit te brei nie, het dit glo onder die munisipale bestuur se aandag gekom dat Van Rooyen ‘n vorige veroordeling in ‘n misdaadsaak het, en dat dit hom diskwalifiseer vir die pos waarin hy tydelik aangestel was. Beweringe rondom die oorsaak vir die beëindiging van Britz se dienste word nog bevestig.
Terwyl daar oor dié kwessies gegis word is inligting oor sake wat die Valke ondersoek, ook besig om stuk-stuk in plek te val.
Kaptein Philani Nkwalase, woordvoerder van die Valke, het die week aan die Oudtshoorn
Courant bevestig dat hulle besig is met ‘n ondersoek by die Oudtshoorn skuiling vir haweloses. Hy het egter gesê dat daar nog nie ‘n saakdossier geopen is nie en daarom kan hulle nie verdere kommentaar oor die ondersoek lewer nie. Volgens betroubare inligting handel die ondersoek oor finansiële ongerymdhede by die skuiling wat glo verband hou met die aankoop van boumateriaal.
Tydens ‘n raadsvergadering wat op 9 Mei deur die Oudtshoorn Courant bygewoon is, was onregmatige en vrugtelose uitgawes een van die agendapunte. Tydens die vergadering is ‘n verslag oor uitgawes wat bevraagteken word behandel. Paulse het gesê daar sal streng opgetree word teen amptenare wat hulle aan onreëlmatighede skuldig maak.