Maggie en medebeskuldigdes in hof
Magdaleen (Maggie) Titus, die vrou van die oorlede Preston Titus, het Maandag saam met twee van haar drie medebeskuldigdes in die Oudtshoorn-landdroshof verskyn.
Titus word daarvan aangekla dat sy en die ander beskuldigdes, haar man, die nag van 1/2 Desember 2017 vermoor het.
Hy is met verskeie steekwonde in sy huis op die weermagbasis gevind.
Saam met Titus in die hof was Masithembe January (MJ) en Justice Mooi. Mooi is in Januarie vanjaar borgtog geweier. Natasha Stuurman, wat reeds op 9 April vanjaar op borgtog van R15 000 vrygelaat is, was afwesig omdat sy glo in die hospitaal opgeneem is.
Titus is op 7 Mei borgtog van R30 000 in die Kaapse hooggeregshof toegestaan na daar teen die weiering van haar borgtog in Oudtshoorn geappelleer is.
Adv. Michelle Weyers, die staatsaanklaer in die saak, het Maandag in die landdroshof aangedui dat die saak steeds deur die polisie ondersoek word en dat daar nog ondermeer vir forensiese- en DNS-uitslae gewag word.
Weyers het verder gesê dat MJ se borgtogaansoek op 12 Junie (volgende Donderdag) in die hof aangehoor sal word.
Eugene Roos, Mooi se regshulpprokureur, het die hof gevra om die staat te waarsku om nie weer met sy kliënt te praat voor hulle hom nie eers daarvan in kennis gestel het nie.
Roos het aangedui dat lede van die polisie by die tronk opgedaag het en DNS van Mooi wou hê.
“Ons sou nie kapsie aangeteken het nie, maar ek moet eers in kennis gestel word voor my kliënt genader word.”
Die saak teen al die beskuldigdes is vir verdere ondersoek tot 11 Julie uitgestel.