Roomyskoek
Hierdie koek is so maklik om te maak, jy het net ’n vrieskas nodig!
genoeg vir 1 koek
100 g wit baksjokolade pienk poeier kos kleursel 5 liter gladde aarbei-envanieljeroomys (koop een in ’n ronde houer) 2 liter gladde aarbeiroomys 250 ml room pienk koskleursel 1 hand vol veelkleurige koekstrooisels
Begin hier
Smelt witsjokolade in glasbak oor pot met pruttende water. Kleur pienk met poeierkleursel. Skep lepels vol van die sjokolade op bakpapier en trek met die agterkant van ’n eetlepel daardeur vir lang ovaalvorms. Laat stol in yskas. Doop 5-liter-roomyshouer vinnig in kookwater en keer uit op koekstaander – die roomys is dan reeds in koekvorm. Smeer kante gelyk met slaplemmes. Plaas koek met staander en al terug in vrieskas.
Stap 1
Skep balle aarbeiroomys op ’n bakplaat en plaas in vrieskas sodat die balle lekker hard vries.
Stap 2
Wanneer dit tyd is om die koek voor te sit, klits room tot sagte punte vorm. Kleur een helfte pienk met koskleursel. Pak roomysballe bo-op koek.
Stap 3
Skep die ongekleurde room om die beurt met die pienk room in ’n spuitsak met stertuit. Spuit roomspirale oral tussen roomysballe en onder om die koek.
Stap 4
Trek sjokolade-ovaalvorms van bakpapier af en steek oral in koek. Sprinkel koekstrooisels oor en sit voor.