Doen jou deel om kuslyn skoon te hou
STILBAAI ‘n Groep vrywilligers gaan Saterdag 22 Julie die strande vanaf Jongensfontein in die rigting van Stilbaai opruim.
Hul benodig nog mense om te help. “Ons verskaf die plastieksakke en almal se harde werk sal beloon word met ‘n worsrol en ietsie te drinke wat deur Stilbaai Spar geborg word,” sê Miranda van Aardt (organiseerder).
Sy noem verder dat alle plastiek wat hul optel op ‘n vorm ingevul word wat hul na SA Plastic sal deurstuur. Volgens haar sal niks wat opgetel word weggegooi word nie, maar herwin sal word.
Om deel te wees die dag SMS jou naam, kontakbesonderhede en die hoeveelheid mense wat wil bywoon na 082 475 8040. Die spertyd is 20 Julie. Almal ontmoet mekaar om 14:00 by Drie Pikkewyne Restaurant op Jongensfontein.