HUL EIE EKSOTIESE OASE
’n Johannesburgse paartjie het inspirasie uit Marokko gebruik om hul badkamer in ’n stylvolle, rustige ruimte te omskep.
Ons badkamer voel soos ’n toevlugsoord ver van die daaglikse gewoel. – Carmel
CCarmel en David Ives het geweet hul droombadkamer moet ’n kalm ruimte wees, ’n stylvolle vertrek waar hulle kan ontspan. Hulle is dol oor die romantiek van die Marokkaanse voorkoms – ’n tema wat deur hul hele huis herhaal word. Toe hul en suite-badkamer ’n nuwe baadjie moes kry, was dit natuurlik dat hulle weer inspirasie uit dié bekoorlike land sou put.
“Ons wou iets buitengewoons hê,” sê Carmel. “Maar die vertrek is klein, met te min ruimte vir ’n aparte bad en stort.” Toe besluit die paartjie om die stort bo die bad te laat installeer in ware hammamstyl, waar verfrissende stoomwolke hulle kan omhul net soos in ’n regte spa.
Hulle het die hulp van Sachar Pistorius van Urban Abbey Construction ingeroep. Hy het die toilet en klein stort (voorheen ’n aparte vertrek) omskep in ’n ruim bad-en-stortnis wat met trappies bereik word. Die bad is ingebou met bakstene, waterdig gemaak en toe in die perfekte vorm gepleister. Daarna is ’n afvlaklaag aangewend.
Vertikale vensters bo die wasbakke is vervang met ’n enkele hoë smal, horisontale venster, terwyl ’n groter venster in die stort ’n verfrissende, “oop” gevoel gee. Vir die twee wasbakke is ’n swewende blad van betonlateie gemaak.
Die paartjie kon nie twee identiese Marokkaanse spieëls kry nie, maar Sachar het Carmel oortuig om twee in verskillende dog komplementêre style te kies – een meer manlik en die ander vroulik.