Groter, beter en mooier
“Die huis het baie oop hoekies gehad wat ons kon inkorporeer en sodoende die vloeroppervlak groter maak sonder om die erf toe te bou,” vertel Aletté. “Ons het meestal boontoe gebou en onbenutte ruimtes deel gemaak van die huis.
“Voor bouwerk begin het, was daar drie slaapkamers, twee badkamers en al die leefvertrekke op een vlak. Onder was ’n keldervertrek met ’n badkamer.”
Nadat hulle die keldervertrek in Heinz se ateljee omskep het, ’n braaikamer bo-op dit aangebou en die stoep bedek het, is die huis nou meer as groot genoeg en strek dit oor drie vlakke.
Dit was Heinz en Aletté se eerste regruk, “maar bou is nie vir sissies nie,” sê hulle nou, en lag.
“Daar is altyd onvoorsiene dinge,” verduidelik hy. “Ons was eintlik die projekbestuurders, en die kommunikasielyne tussen ons, die bouers van Crous Construction en die onafhanklike kontrakteurs wat van die kleiner werkies gedoen het, het soms gekruis, wat tot vertragings gelei het. En dit kos natuurlik geld.” Maar uiteindelik is hulle spyt oor niks. “Ons hou veral van die binnebraai – vernaamlik in die somer, wanneer ons die groot vensters heeltemal kan oopgooi,” sê Heinz.
“Ek hou van die rooi voordeur, en die groot eiland in die kombuis,” vertel Aletté. “En natuurlik die stoep! Dis lekker om na buite te leef.”
En die kinders is klaarblyklik ook in hul noppies. “My gunstelingplek is my kamer, ek hou baie daarvan,” sê klein Lian. “En ek hou daarvan om met my boeties te speel, en die swembad – en die geel swing in die speelparkie hier naby.”
Die leefvertrek bo is so groot soos ’n dubbelgarage, en dis hier waar Aletté haar voorkomskonsultasies doen. “Die kinders kan eendag wanneer hulle groot is hierdie vertrek hul kuierplek maak,” sê sy. >>