Hartsiekte by honde
Lindy du Toit van Pretoria skryf My vriend se poedel is gediagnoseer met mitrale inkompetensie, en blykbaar is dit baie ernstig. Ek het nog nooit daarvan gehoor nie, maar nou is ek bekommerd oor my eie twee poedels. Waarvoor moet ek uitkyk?
Jacqueline Mthembu, projekbestuurder by Boehringer Ingelheim,
antwoord Mitrale inkompetensie is die gevolg van ’n hartklep wat lek. Dis die algemeenste hartsiekte onder honde en kom gewoonlik voor by klein tot middelslagrasse wat minder as 20 kg weeg, soos foksterriërs, poedels, schnauzers en chihuahuas.
Die toestand veroorsaak dat die hartkleppe verdik, gevolglik maak dit ná elke hartklop nie behoorlik toe nie. Daar loop dan bloed terug in die linkeratrium en dit veroorsaak ’n “gesuis” wat ’n veearts net met ’n stetoskoop kan waarneem.
As jou hond vinnig asemhaal, kortasem is of flou val, moet jy hom liefs laat ondersoek.
Omdat tekens van hartsiekte in die vroeë stadiums nie maklik sigbaar is nie en jou hond se liggaam waarskynlik aanpas om die simptome te verlig, bestaan die moontlikheid dat jy nie sal agterkom hy is siek nie. Maar mettertyd sal sy liggaam nie meer die siekte kan beveg nie, en dit kan lei tot hartversaking.
Dit is dus uiters belangrik dat jou veearts gereeld jou hond se hart ondersoek. Hoewel daar nie ’n geneesmiddel is nie, kan jou dieremaat ’n lang, gelukkige lewe lei mits die siekte vroeg gediagnoseer en goed bestuur word. Studies het bewys dat behandeling tydens die vroeë stadiums van ’n lekkende hartklep jou hond se lewe kan verleng.
As jy enige veranderinge in jou hond se gedrag, eetlus of aktiwiteitsvlak oplet, as jy vermoed hy is dalk ’n risiko-geval of as hy van ’n klein ras en ouer as sewe is, is dit bitter belangrik dat jou veearts gereeld sy hart ondersoek.