Die Bergs
Charlize Berg se spoggerige troue word op die kassie uitgesaai.
Dis uiteindelik sulke tyd! Kykers deel in die sangeres Charlize Berg (25) se groot dag wanneer haar troue met die argitek Warren Linden in episodes 10 (21 Junie) en 11 (28 Junie) van die realiteitreeks Die Bergs (2017-nou) op VIA uitgesaai word.
DIE VOORBEREIDING
Charlize en haar gesin se senuwees is behoorlik op hol wanneer die voorbereiding by Oakfield Farm buite Krugersdorp begin. Volgens Charlize se ma, Ilse, kon hulle net ’n dag voor die troue die venue regkry vir die 132 gaste. “Gelukkig was die meeste van die groot dekorstukke klaar gerangskik en die tafels gedek. Ons moes net die laaste paar versierings op die tafels sit,” vertel Ilse.
Daar is elf tafels vir gaste plus die bruidstafel. Die tafels is versier met een groot tafelruiker wat op ’n spieël staan, en omring is deur agt potjies met kersies in. Daar is ’n spyskaart met ’n geskenkie vir elke gas op die tafel. Die vroue kry elk ’n stel oorbelletjies van Ralph Jacobs, en die mans ’n botteltjie mampoer – wat ’n lekker bederf!
DIE GROOT DAG
Die groot dag breek in episode 12 aan. Bekendes wat die troue bywoon sluit in die sangers Jakkie Louw, wat seremoniemeester speel, en Kevin Leo, en die ontwerper Diaan Daniels wat Charlize se trourok uit Chantillykant materiaal gemaak het .“Die tema van die troue is ‘Bohemian Glam’ en die kleurskema is roosgoud, sjampanje en poeierpienk,” vertel Ilse.
Dit klink glad nie na ’n sakpastroue nie, maar Ilse sê dit was nie uitspattig nie. “Ons het gelukkig by die begroting gehou. Ons kan wel nie verklap hoeveel dit was nie.”
Ai, nou is ons eers nuuskierig!