The Office
Seisoen 1 SABC3 (*193) 22:00 Komedie
Steve Carell is nie net ’n snaakse ou op TV nie – hy’s dié snaakse man en dis te danke aan ’n klein komediereeks, The Office (2005-2013). Hy speel Michael Scott, die chauvinistiese en taktlose bestuurder van die Dunder Mifflin-papiermaatskappy se Scranton-tak, en die 54-jarige skerts nie wanneer hy sê: “Ek wil hê mense moet bang raak vir hoe lief hulle Michael het. Hy’s die ergste, maar hy’s ook die beste.”
1 Steve is ’n toegewyde RoomsKatoliek, maar haat dit om oor geloof te praat. “Dis soos die politiek – ek kan nie ’n deskundige mening gee nie en bly liewer stil,” sê hy. 2 Carell is nie sy regte van nie en dis nie ’n verhoognaam nie. Steve se ingenieurpa is as Edwin Caroselli gebore, maar Steve het die van verander. 3 Hy erken al wou hy altyd in die vermaakbedryf wees, moes hy los werkies aanvaar om sy rekenings te betaal. Soos posbode wees. “Maar dit het nie lank geduur nie. Ek was regtig sleg daarmee,” sê hy. 4 Steve was altyd goed met improvisasie – hy was op hoërskool by Middlesex in Massachusetts al betrokke by komediesketsgroepe, en het sy deurbraak gemaak in The Dana Carvey Show (1996) saam met Dana (Garth in die komiese fliek Wayne’s World, 1992). 5 Buiten om mense te laat lag speel Steve yshokkie (hy speel in celebliefdadigheidsgeleenthede). Maar wanneer hy wil wegbreek, pak hy rakke in sy kruidenierswinkel. Hy sê: “Daar’s iets aan rakke pak wat jou nederig maak.” 6 Hy en sy vrou, Nancy (50), het ’n dogter, Elisabeth (16), en seun, John (13). Nancy het kameerolle in sy programme, soos die eiendomsagent Carol in The Office.