Sharp Objects
Seisoen 1 M-Net (*101) 22:05 Drama
Vir die gevierde aktrise Amy Adams was die rol van die gebroke alkoholiskarakter Camille Preaker in die 2018Minireeks Sharp Objects “die skrikwekkendste maar ook mees louterende ondervinding van my loopbaan tot dusver. Ek het nie haar donkerte en die diepte van haar interne woede nie, maar die hartseer wat jou kan dryf om jouself so seer te maak? Ek dink ek het dit.”
Maar ná sy haar karakter se littekens gesien het, erken Amy sy sou bang wees om haarself te sny. “Ek het nakend daar gestaan vir drie tot vier uur terwyl hulle die snymerke op my geplak het. Ek kon dit goed sien. Wat moet ’n mens deurmaak om dit aan jouself te doen?” Die reeks is gegrond op die gelyknamige 2006-roman deur Gillian Flynn, en sy sê Amy was haar enigste keuse om die joernalis Camille te speel. “Ek dink nie ander aktrises sou dit regkry om Camille se weerloosheid uit te beeld nie terwyl haar ma haar dwing om haar demone in haar tuisdorp te beveg.”
Buiten die grusaamheid van die twee moorde waaroor Camille verslag doen, word sy ook gekonfronteer deur haar alkoholisme en haar suster se dood wat haar as tiener in ’n psigiatriese kliniek laat beland het. Haar sosialevlinderma, Adora (Patricia Clarkson, Jane in die politieke drama House Of Cards, 2013-nou), help nie met haar baaspelerigheid nie, maar Camille kry verligting in die vorm van
speurder Willis (Chris Messina, dr. Daniel in The Mindy Project, 2012-2017), wat die polisiesaak lei. En as die jong Camille in terugflitse bekend lyk, sy word gespeel deur Sophia Lillis, Beverly in die 2017-gruwelfliek IT.