Hulle doen dit

John Nzira

MIDRAND

John, ’n Zimbabwiër wat sy permakultuuropleiding by die Fambidzanaipermakultuurinstituut in sy geboorteland gedoen en later ook opleiding by Bill Mollison gekry het, is pas gekies om Suider- en Oos-afrika in September vanjaar by die International Permaculture Convergence in Londen te verteenwoordig.

John het landbou-ekologie in Israel, omgewingsbestuur in Kanada en volhoubare landbou in Amerika gestudeer, en in 2005 gehelp om die suksesvolle Ukuvuna-demonstrasieplaas in Midrand te vestig. Dié plaas van 1 ha wat ook as opleidingsentrum dien en 15 mense heeljaar van kos voorsien, inkorporeer verskeie permakultuurkomponente soos waterbestuur (die oes van reënwater, die herwinning van grys- en swartwater en buffersones), grondbestuur (erosiebeheer, die maak van kompos, deklae en ’n erdwurmboerdery), voedselbewaring en die gebruik van hernubare energie. John sê “Permakultuur is ’n leefstyl waar jy jóú kultuur kan uitleef, waar jy die kos verbou wat jy wil eet en waar jy ’n omgewing skep waarin jy wil bly. Jy het nie baie ruimte nodig om permakultuur te beoefen nie, maar wel ’n weldeurdagte ontwerp.” ukuvuna.co.za info@ukuvuna.org

johnnzira@gmail.com

Hazel Mugford ADDO

Hazel was ’n rekenmeester in Johannesburg voor sy ’n boek oor permakultuur gelees en die gogga haar gebyt het. Sy het ’n permakultuurdiplomakursus in Brittanje en ’n sertifikaatkursus in permakultuurontwerp in Suid-afrika voltooi, en is al 10 jaar betrokke by permakultuur. Sy is ook die dryfveer agter Permakultuur SuidAfrika se skool in die Oos-kaap. Hazel sê “Een van die grootste wanopvattings oor permakultuur is dat net hippies dit beoefen en daarin belang stel. Ek is ’n tipiese rekenmeester wat altyd al die vooren nadele opweeg voor ek ’n besluit neem, en het by Permakultuur SuidAfrika al van breinchirurge tot kommersiële appelboere opgelei. Ek was nog nooit spyt dat ek sommemaak vir grond verruil het nie. Daar is so baie probleme in die wêreld, maar deur permakultuur te beoefen kan ons een ding op ’n slag verander.”

info@permaculturesouthafrica. com Permaculture South Africa

Alex Kruger

LADISMITH

Alex het in 1993 haar sertifikaatkursus in permakultuurontwerp by die Fambidzanaiopleidingsentrum in Zimbabwe voltooi en is pas terug uit Spanje waar sy klasgegee het by die La Loma Viva-projek. Sy is betrokke by die Berg-en-dal-opleidingsentrum op Ladismith in die Klein-karoo en bestuur ook die opleidingsprogram Permaculture Education Africa saam met Kent Cooper. Alex sê “Vir baie mense is ’n eie groentetuin die eerste stap na ’n permakultuurleefstyl. Ons het vandag amper geen sê in wat ons eet, waar ons bly of watter bronne van energie ons gebruik nie. Permakultuur bied ’n ontwerpraamwerk wat ons help om ’n meer gesonde en vervullende leefstyl te skep. Deur jou eie kos te kweek verklein jy jou koolstofvoetspoor en jý is in beheer van die gehalte van dit wat jy eet. Jy gaan ook baie nuwe vriende maak met al die kos wat jy weggee!”

info@berg-en-dal.co.za berg-en-dal.co.za