Avokado-enpiesangmuffins
Maak 12
Bereidingstyd 15 minute Baktyd 25 minute
Hierdie ligte muffins is heerlik klam en is op hulle lekkerste sodra dit uit die oond kom – met dik botter daarop. My kinders hou ook daarvan in hulle kosblik. Jy kan die piesang in die resep met nog ’n avokado en ’n eetlepel (15 ml) gerasperde sitrusskil van jou keuse vervang.
Jy benodig
• 3 koppies (750 ml) meel • 1 teelepel (5 ml) sout • 1 eetlepel (15 ml) bakpoeier • 1 koppie (250 ml) suiker • ½ koppie olyfolie • 1 ryp avokado • 1 ryp piesang • 2 eiers • 1 koppie (250 ml) volroommelk • 3 eetlepels (45 ml) suurlemoensap
Só maak jy
Voorverhit die oond tot 200 ºc. Smeer ’n muffinpan met 12 holtes met botter (of gebruik kleefvrye kossproei) en druk ’n kolwyntjiepapier in elke holte. Sif die meel, sout en bakpoeier saam en roer dan die suiker by.
Gooi die olyfolie, avokado, piesang, eiers, melk en suurlemoensap in ’n voedselverwerker en pols dit tot ’n gladde mengsel. Roer dit dan deur die meel tot dit net-net gemeng is. Vul die kolwyntjiepapiertjies amper tot bo.
Bak dit vir 25 minute tot die muffins goudbruin en gaar is.
Platteland sê
Dié muffins sal vir tot vier dae in die yskas hou as jy dit in ’n lugdigte houer bêre. Die beslag kan ook soos ’n piesangbrood in ’n broodpan gebak word – dis gaar as ’n tandestokkie skoon uitkom. >