Koue avokadoroomsop met vars salsa
Genoeg vir 4-6 Bereidingstyd 20 minute Gaarmaaktyd 10 minute
Hierdie sop is heerlik vars en koel vir die warmer dae wat voorlê. Maak seker dit is behoorlik koud wanneer jy dit voorsit.
Jy benodig
• 3 koppies (750 ml) yskoue groenteaftreksel
• 1 bossie vars koljanderblare (met stingels)
• ¼ koppie (60 ml) olyfolie
• 1 ui, gekap
• 2 groot avokado’s
• sap van 1-2 lemmetjies
• sout en varsgemaalde swartpeper na smaak
VIR DIE SALSA
• 4 ryp romatamaties, fyngekap
• 3 eetlepels (45 ml) koljanderblare, gekap (die blare van die stingels wat jy vir die sop gebruik het)
• 1 rooiui, fyngekap
• 1 brandrissie, saadjies uitgeskraap en fyngekap
• sap en gerasperde skil van 1 lemmetjie
• 150 g garnale, skoon- en gaargemaak
Só maak jy
Maak seker die aftreksel is yskoud. Was die koljanderblare baie goed. Breek die blaartjies af en hou dit eenkant vir die salsa. Kap die stingels fyn. Verhit die olyfolie in ’n pan en soteer die ui en koljanderstingels. Laat dit eenkant afkoel.
Pols die helfte van die aftreksel saam die avokado en uiemengsel in ’n voedselverwerker tot dit dik en romerig is. Voeg nog aftreksel by tot die sop so dik is soos jy dit verkies – voeg nog avokado by as jy dit wil dikker maak. Geur dit na smaak met lemmetjiesap, sout en varsgemaalde swartpeper en sit dit dan in die yskas sodat dit weer yskoud kan word.
Maak die salsa deur die tamatie, koljanderblare, ui, rissie en lemmetjiesap en -skil te meng. Roer dan die garnale by. Sit die salsa voor saam met ’n klein porsie van die sop. >