Bevrore suurlemoenjogurt

Genoeg vir 6

Bereidingstyd 10 minute plus vriestyd

Dié bevrore sorbet het ’n verfrissende suurlemoengeur, maar is danksy die avokado lekker romerig.

Jy benodig

• 1 groot avokado

• 2 koppies (500 ml) dik Griekse jogurt

• ½ koppie (125 ml) volroommelk

• 2 eetlepels (30 ml) suurlemoensap

• 1/8 teelepel (0,6 ml) sout (’ n Mens noem dit ’n knippie. – Reds.)

• 2 eetlepels (30 ml) suiker

Só maak jy

Pols al die bestanddele saam in ’n voedselverwerker tot glad en romerig. Proe en voeg nog suiker of suurlemoen na smaak by. Draai die mengsel in ’n roomysmaker tot dit reg is om te eet, of skep dit in ’n bak, sit dit in die vrieskas en roer dit elke halfuur tot dit gevries is (dit sal 3-4 uur neem).

Sit die bevrore jogurt voor met vars mentblare en spanspekbolletjies.