Korrelkonfyt met speserye

Maak 2 klein flessies Bereidingstyd 5 minute Gaarmaaktyd 20 minute Is dit ’n konfyt of ’n blatjang? Hierdie variasie van korrelkonfyt met speserye herinner aan blatjang, maar is meer soet as suur. Sit dit voor met jou Sondaglamsboud of geroosterde vark. Óf saam met bloukaas op ’n sny vars rogbrood.

Jy benodig

• ½ teelepel (2,5 ml) elk komynsaad ( jeera), mosterdsaad, fenegriek (methi), vinkelsaad en nigella-saad (kalonji) • 4 koppies (1 ℓ) gemengde druiwekorrels

• ½ koppie (125 ml) bruinsuiker

• 4 cm vars gemmer, gerasper

• sap van 1 suurlemoen

• 1/3 koppie (80 ml) water

• 2 teelepels (10 ml) sout

Só maak jy

Verhit al die speserye in ’n droë kastrolletjie totdat dit begin skiet en geurig raak. Hou die spulletjie fyn dop – dit moenie bruin raak nie. Voeg nou die res van die bestanddele by, sit die deksel op en prut dit vir 20 minute oor matige hitte. Laat die mengsel afkoel en bêre dit vir tot ’n maand in ’n fles in die yskas. >