Druiwe-envinkelpasta
Genoeg vir 6 Bereidingstyd 10 minute Gaarmaaktyd 30 minute
Pasta met rosyntjies het sy herkoms in Sardinië. Sit dit op ’n soel somersaand voor met ’n glas goeie droë witwyn.
Jy benodig
• 2 koppies (500 ml) kokende
tuisgemaakte hoenderaftreksel • 1 knippie saffraan • ’n hand vol sultanas • 2 groot vinkelbolle • 6 eetlepels (90 ml) olyfolie • 2-3 salotte, fyngekap • 300 g spaghetti-pasta • 10 cm chorizo, in vuurhoutjies
gesny • 1 koppie (250 ml) druiwe
korrels, middeldeur gesny • 200 g amandelvlokkies of
-splinters, liggies gerooster • 4 eetlepels (60 ml) broodkrummels
Só maak jy
Gooi die kokende aftreksel oor die saffraan en sultanas. Kap die bolgedeelte van die vinkel plus 2-3 cm van die stingel fyn. Verhit die olyfolie in ’n pan en soteer die vinkel en salotte daarin tot dit sag is. Gooi die aftreksel met die saffraan en sultanas by die groente en prut dit vir 5 minute oor lae hitte.
Kook intussen die spaghetti in kokende soutwater tot al dente. Roerbraai die chorizo en druiwe in ’n tweede pan oor hoë hitte tot dit deurwarm is. Skep die mengsel uit en hou dit eenkant (moenie die pan uitvee nie). Roerbraai die amandels en broodkrummels liggies daarin tot net-net goudbruin.
Dreineer die pasta en verdeel dit tussen die borde. Skep van die vinkelsous bo-oor. Verdeel die druiwe en chorizo tussen die borde, en sprinkel amandels en broodkrummels oor elke porsie.
WENK
As jy van die geroosterde sjerriehoender (resep op bl. 91) of gerookte makriel (sien die artikel “Waar ’n rokie trek”, bl. 108) byderhand het, vlok daarvan in hierdie pasta – dit sorg vir ’n heerlike ekstra oemf.