Frambooslimonade
Maak 750 ml Bereidingstyd 10 minute Gaarmaaktyd 10 minute
Hierdie resep is regtig maklik en kan met vars óf bevrore bessies gemaak word. Dis ’n treffer om voor te sit, maar jy kan dit ook in ’n mooi bottel gooi waarom jy ’n strik vasmaak en dit vir jou gasvrou gee.
Jy benodig
• 400 g vars of bevrore frambose • sap van 2 suurlemoene • 1 koppie (250 ml) water • 1 koppie (250 ml) suiker
Só maak jy
Verpulp die frambose in ’n voedselverwerker saam met die suurlemoensap en water. Gooi dit deur ’n sif en gooi die pitte weg. Verhit die vloeistof en suiker in ’n kastrol en roer dit vir 10 minute oor matige hitte tot die suiker opgelos het. Laat die mengsel vir ’n paar minute prut en sit dit dan eenkant om af te koel voor jy dit in die yskas bêre om yskoud te word.
Sit dit voor met sodawater na smaak plus ys en mentblare.