CALLIE & MARIANA LINDES

Eienaars, Strandveld Pub, Restaurant & Functions

Callie en Mariana, voorheen van Somerset-wes, is sekerlik twee van B’bos se gasvryste inwoners wat hulle vakansieplek op Velddrif verkoop en 5½ jaar gelede sak en pak hierheen getrek het – dis nou nadat hulle tender aanvaar is om die huurkontrak van dié kroeg-en-kuierplek in die bodorp oor te neem.

“Aan die begin het dit maar ’n bietjie geknor... ons was mos inkommers en so aan, maar as jy eers die mense leer ken en inskakel, aanvaar selfs jou vyande jou naderhand,” sê Callie terwyl hy aan die kop van hulle kombuistafel ’n bak deeg knie wat hulle later as plaasbrood saam met die gebraaide snoek en patats gaan voorsit.

“Die eerste mens wat ons hier ontmoet het, was tannie Mara se oorle’ man, oom Manie Groenboontjie. Hier is mos so baie Groenewalds en Fouries en De Wets dat almal maar ’n bynaam kry,” sê Mariana. “Dis een van die hoofredes waarom ons so gelukkig is hier: want die ménse is so lekker.”