SUZI HOLTZHAUSEN
Sjef en grondeienaar
Suzi het haar eie kookskool in Johannesburg gehad voordat sy 14 jaar gelede Weskus toe getrek en die restaurant Gaaitjie op Paternoster oopgemaak het. (Die restaurant is intussen verkoop en sy kook nou Dinsdagaande by haar huis.)
’n Ontmoeting met Stanley en Lainy Carpenter, wat die Lokal-restaurantperseel op Baardskeerdersbos besit, het daartoe gelei dat Suzi sedert Desember 2015 elke maand ’n week lank op B’bos kom kuier en oor die naweek saam met die Carpenters ’n “pop-up”-restaurant bedryf. Die spyskaart, wat elke maand anders is, word gedikteer deur die seisoene en wat in die restaurant se groentetuine beskikbaar is.
Nou het Suzi ’n erf gekoop op die dorp. “Ek is verslaaf aan die Weskus,” sê sy, “maar as sjef bekommer dit my dat daar op Paternoster nie meer seekos oor is nie. En vir enigiets wat jy wil kweek, moet jy eers ’n windskerm bou.”
Die gehalte en verskeidenheid van die vars, organiese bestanddele – van vleis tot sampioene – in die Baardskeerdersbos-omgewing verras haar telkens, om nie eens te praat van die magdom mense met spesialiskennis nie.