Diepgebraaide artisjokke

Die Italianers maak dié heerlike happies van baie jong, heel baba-artisjokke en noem dit Carciofi alla Giudia.

Genoeg vir 4 Bereidingstyd 20 minute Gaarmaaktyd 10 minute

JY BENODIG

• 4 vars jong artisjokke, skoongemaak

(aanwysings op bl. 100) • sout • koekmeel • druiwepit-, canola- of avokado-olie • vars suurlemoenwiggies

SÓ MAAK JY

Sny die skoongemaakte artisjokke in kwarte. Verhit ’n kastrol vol soutwater tot kookpunt en kook die artisjokke vir 4 minute daarin.

Hou ’n bak vol yswater gereed en dompel die artisjokke ná 4 minute daarin om die kookproses onmiddellik te stop. Skep die artisjokke uit die yswater sodra dit afgekoel het en laat dit droog drup op kombuispapier. Druk dit dan verder droog met nog kombuispapier.

Meng koekmeel met ’n knypie sout en sprei dit uit op ’n bord. Verhit genoeg olie vir diepbraai in ’n kastrol.

Rol die drooggedrukte artisjokke in die meel en dompel dit dan in die warm olie. Braai dit in sarsies vir omtrent 2 minute of tot dit goudbruin is. Skep die artisjokke met ’n gaatjieslepel uit die olie en laat dit op kombuispapier dreineer.

Sprinkel ’n bietjie sout oor en sit dit so gou as moontlik voor saam met ’n wiggie suurlemoen.