WAAR’S VENTERSTAD EN OVISTON DAN?
Die skrywer van die artikel oor die Gariepdam in die Lente 2017-uitgawe van Platteland vertel nie die volle verhaal nie.
Gariepdam en Norvalspont lê aan die oewer van die dam, maar Burgersdorp is 70 km van die dam af. Daar word ook niks gesê van Venterstad of Oviston nie, wat ook op die oewer lê.
Oviston is die dorpie waar die water van die Gariepdam ingelaat word om met die 84 km lange Oranje-vistonnel naby Cradock in die Visrivier uit te loop en van daar af met verdere tonnels tot by Port Elizabeth.
Van Oviston af draai die pad noordwaarts na Bethulie, die dorp in Suid-afrika wat die meeste naamsveranderings ondergaan het en waar die langste gekombineerde pad en spoorbrug die bodeel van die dam kruis. Hier is ook ’n kampkerkhof waar daar gedurende die Anglo-boereoorlog 1737 vroue en kinders gesterf het. As gevestigde dorp beskik Bethulie oor die boekehotel waar 120000 boeke en 80000 plate geberg word.
Van Bethulie af draai die pad weswaarts na die Gariepdam. Die volle roete om die dam beloop sowat 160 km.