BEAR DOEN DIT WEER

DEUR: BEAR GRYLLS UITGEWER: ORION PRYS: R310 Ek was verbaas toe ek hoor die Britse oorlewingskenner het aan ’n reeks romans begin skryf. Maar die eerste een, GhostFlight, het ’n topverkoper in Brittanje geword.

Ek het die tweede boek in die reeks, FallenAngels, ewe flink deurgedraf. Hy is g’n André P. Brink nie, maar sy kort hoofstukke en boeiende, vinnige storielyn hou die blaaie aan die ritsel. Ewe indrukwekkend is die oud-SAS-soldaat se kennis van sy onderwerp.

Die hoofkarakter, die oudsoldaat Will Jaeger, en sy span spesmagsoldate spring uit vliegtuie, jaag op die see, veg op strande en in die bos. Tussenin ontrafel hy stukkie-virrukkie die raaisel van sy familie se verdwyning en die hoogs geheime organisasie wat die hele mensdom wil terugneem na die dae van Hitler.