So amper kake toe...

Ons was onlangs in die Krugerwildtuin waar ons in een van Onder-Sabie se rondawels tuisgegaan het. Op ’n dag ry ons verby die Ntandanyathi-skuiling, maar hier sien ons toe ’n vreemde ding: ’n Klompie blouwildebeeste drom saam op die oewer van ’n stroompie en lyk onrustig. Dis toe dat ek ’n krokodil in die water sien.

Die volgende oomblik besluit een van die wildebeeste hy steek die water oor, ondanks die krokodil. Intussen sit ek die petalje en dophou deur my Canon 650D-kamera met sy 55-250 mm-lens op. Soos hy spring, begin ek neem en vang sy waagmoed op ’n hele paar raampies vas. Ek sou nie sê ek is ’n kranige fotograaf nie; ek neem eerder foto’s vir die lekkerte.

Dis wel nie aldag dat ’n mens ’n blouwildebees dié soort ding sien oorleef nie – wat nog om ’n foto daarvan te neem!