Hoe standaard is standaardtoerusting?
As een motorvervaardiger ’n volledige reeks standaardtoerusting in ’n sekere prysklas kan bied, hoekom kan almal van hulle dit nie doen nie, vra Mic van Zyl.
Sluitweerremme, stabiliteitsen vastrapbeheer en lugsakke behoort boaan die lys van standaardtoerusting te wees.
Dubbelkajuitbakkies is gewilder as ooit, en dis omtrent ’n moeilike besluit as jy een moet kies waarop jy jou swaarverdiende geld gaan uitgee. Ek het dié saak al met ’n klomp vriende bespreek, en dit lyk my die meeste mense voel soos ek.
Bakkie-eienaars is gewoonlik baie lojaal teenoor die handelsnaam wat hulle gekies het. ’n Mens kan dit duidelik sien as jy in ag neem hoe hierdie voertuie met elke nuwe geslag verbeter. Daar is egter ’n groot groep voornemende kopers wat die dubbelkajuitbakkiemark betree en nie noodwendig enige lojaliteit teen- oor ’n handelsnaam het nie. Dit vorm dus nie deel van die besluit wat hulle uiteindelik neem nie.
Tans sluit die voorste dubbelkajuitbakkies modelle van Toyota, Ford, Mazda, Volkswagen, Mitsubishi, Isuzu en Nissan in, en almal van hulle is wonderlike veeldoelige leefstylvoertuie. En hoewel hulle almal ’n heel skaflike veldryvermoë het, verskil die vlak van dié vermoë van model tot model. Wanneer ’n mens begin kyk na hoe geskik die voertuie is vir ernstiger veldry en rowwer terrein, word daardie gapings selfs groter.
Daar is ook ’n subtiele verandering te bespeur in die fokus van sommige van dié bakkies. Sommige vervul meer van ’n bomarkse veeldoelige leefstylrit, terwyl ander meer die gevoel van ’n taai werkesel skep. Tussenin kry jy die bakkies wat heel gemaklik met hulle voete in die leefstyl- én werkeselmark staan.
Dit is egter verbysterend as ’n mens kyk na die groot verskil in die vlakke van standaardtoerusting tussen die modelle wat hierdie vervaardigers in die mark druk, veral die bakkies wat in die omgewing van R600 000 kos.
Persoonlike voorkeure oor wat jy graag wil hê en wat jy móét hê, verskil van persoon tot persoon, maar daar is sommige items wat uit ’n veiligheidsoogpunt op die “moethê”-lys hoort.
Die “graaghê”-lys sluit dinge in soos sleutellose toegang, ’n drukknopaanskakelaar, verkoelde mossienes, verhitte sitplekke, sondak, koppiehouers, sagte kajuitbeligting, truspieëls wat toevou, agterpassasiers se eie luggate en dié klas van ding. As ’n mens oor veiligheidstoerusting begin gesels, moet die koste daarvan nie iets wees wat jou verhinder om jou voertuig daarmee toe te rus nie. Sluitweerremme, stabiliteits-en vastrapbeheer en lugsakke behoort boaan die lys van standaardtoerusting te wees vir enige voertuig. Dit is vir my byvoorbeeld onverskoonbaar dat die Amarok nie sylugsakke vir die agterste passasiers het nie – en ons praat hier van die modelle met die topspesifikasies. Die Amarok het wel een van die beste veldryremstelsels wat tans beskikbaar is. Die Ford Ranger Wildtrak beskik oor aanpasbare spoedbeheer én ’n bystandsfunksie wanneer jy van baan wil verander. Dit is wonderlike toevoegings om jou veilig te hou.
’n Trukamera en parkeerafstand- beheer aan die voor- en agterkant van die bakkie is na my mening broodnodig, veral in die betonoerwoud waar parkeerplekke heel duidelik nie vir dubbelkajuitbakkies ontwerp is nie. ’n Mens loop ook in ’n parkeergarage die gevaar dat ’n klein kind voor jou inloop terwyl jy besig is om agteruit te stoot.
Bestuurdersposisie is nie net iets wat vir jou gemak moet sorg nie. Wanneer jy in uitdagende terrein ry, kan die verkeerde bestuurdersposisie daartoe lei dat jy beheer oor jou stuurwiel en/of pedale kan verloor. Dit is verkeerd om jou bestuurdersposisie in die ry te probeer verander, maar ek het myself ook al betrap dat ek dit doen wanneer die terrein effens meer van my begin vra.
Elektriese sitplekverstelling is ’n presiese proses en jy hoef nie die sitplek met jou gewig te probeer skuif nie.
Ek moet eersdaags vir my ’n 4x4dubbelkajuitbakkie met ’n outomatiese ratkas aanskaf, en dis jammer dat ek dit nou oorweeg om weg te beweeg van my gunstelinghandelsnaam, wat ook ’n markleier is. My gunsteling se standaardtoerusting is net té yl gesaai. Daarom wonder ek: As een van die vervaardigers in hierdie mededingende marksegment ’n volledige reeks standaardtoerusting in ’n sekere prysklas kan bied, hoekom kan almal van hulle dit nie doen nie? Mic van Zyl is the direkteur van Ironman 4x4 Africa, die eksklusiewe invoerder en verspreider van die volledige reeks Ironman-4x4-produkte.
ironman4x4.co.za