DIE LANG PAD OP
10 Kruis by Stockpoort
Vergeet van Groblersbrug. Dis heelwat vinniger om die grens by die kleiner Stockpoort-grenspos naby Lephalale oor te gaan. Maak seker jy ry die teerpad van Lephalale af tot op Stockpoort (die grondpad is baie sleg) en moenie jou bekommer oor die 50 km lange grondpad aan die Botswanakant van die grens nie – dis in ’n puik toestand en bring jou tot by die A1-hoofpad net suid van Mahalapye. >
11 Ry dié roete deur Botswana
Moenie die A1- en A3-hoofweg oor Francistown en Nata ry nie. Die pad Maun toe is baie korter en stiller op die A14 wat oor Orapa en suid van die Makgadikgadipanne verbyloop.
Om van Maun tot by Khwai te kom ry jy die grondpad wat noord deur Mababe Village loop. Iewers op hierdie skof vurk die pad en die bordjie dui aan jy moet links draai na Khwai en regs na Savute. Hou hier regs; as jy links draai, moet jy deur Moremi ry en dus die parktarief betaal. Die pad draai wes sodra jy deur Mababe is en die afdraaie na Magotho en Sable Alley lê by die volgende GPS-punte: Magotho-afdraai S19.093310 E23.871491 Sable Alley-afdraai S19.133292 E23.766164
12 Slaap hier oor KHAMA RHINO SANCTUARY
Dié reservaatjie is ’n gemaklike dag se ry van Pretoria af en het groot staanplekke met hope skaduwee. Vra vir staanplek nr. 5, 6, 7 of 8 as jy ’n bietjie privaatheid wil hê én stapafstand van die ablusieblokke wil wees. Die staanplekke het nie krag nie, maar jy kan (gewoonlik) warm stort. Hier is ook ’n restaurant met ’n verassende verskeidenheid op die spyskaart. Dit kos BWP92 (R119) p.p.p.n. om te kamp
en die toegangsgeld beloop BWP87 (R112) p.p. en BWP71 (R92) per voertuig per dag. Jy kan by die ingangshek hout koop teen BWP20 (R26) per sak.
khamarhinosanctuary.org.bw
MAUN REST CAMP
Kamp op die oewer van die Thamalakanerivier aan die buitewyke van Maun in dié skaduryke kampie. Staanplekke het kragpunte en daar is warm storte en gratis wi-fi. Dit kos BWP100 (R129) p.p. vir ’n oewerstaanplek. Jy kan ook ’n voldagbootuitstappie na Chiefs Island bespreek teen BWP1 250 (R1 612).
maunrestcamp.com
13 Pak jou yskas versigtig
In normale omstandighede mag jy enige vleis uit SuidAfrika noord deur Botswana vat, maar geen vleis van die noorde af suid bring nie. Wanneer daar egter spesifieke siektes uitbreek, mag jy byvoorbeeld nie varkof hoenderprodukte deur die grens of veeartsheinings vat nie. Daar mag ook ’n tydelike verbod wees op sekere groente en vrugte. Gesels dus met die AA vóór jy vertrek, om dubbel seker te maak.
14 Maak vol in Botswana
Brandstof is tot R3,50 per liter goedkoper in Botswana as in Suid-Afrika. Maak dus jou jerrykanne aan daardie kant vol en moenie vergeet om jou tenk ook vol te maak voor jy terugkom Suid-Afrika toe nie. Onthou, die naaste vulstasies aan Khwai is in Maun. Ry minstens 40 ℓ spaarbrandstof per voertuig saam as jy lank gaan bly en van plan is om baie wildritte te doen.
As jy vasbrand, vra vir Onks van die Khwai-ontwikkelingsrust (hy maak saans ’n draai om besprekings na te gaan en vullis op te laai) om jou te help. Hy verkoop diesel in Khwai Village teen BWP290 (R375) vir 20 ℓ.
15 Stop by Riley’s
Riley’s in Maun is ’n goeie plek om tenk vol te maak, bande af te blaas (tot ongeveer 1,8 bar) en koeldrank te koop vir die pad Khwai toe. Hier is ook ’n AutoZone indien jy vergeet het om ’n noodwaaierband of gloeilampies saam te bring.
GPS S19.988167 E23.426089