PORTUGESE PLATHOENDER EN ROOSTERBROOD
Vir die vuur
Jy haal hierdie hoender van die kole af en laat hom op ’n gebraaide brood rus... en dan eet jy die hoender en die brood waarin die sousie ingetrek het, so saam-saam. Jy benodig (genoeg vir 6) 1 heel hoender van 2,5 kg 2 teelepels rissievlokkies 2 eetlepels gerookte paprika 6 knoffelhuisies, fyngedruk 1 eetlepel growwesout 1 teelepel fyn koljander ¼ koppie rooiwynasyn ½ teelepel swartpeper ½ koppie olyfolie 1 hele suurdeegbrood, in skywe gesny 4 suurlemoene, middeldeur gesny ½ koppie gekapte pietersielie Só maak jy
1 Vlek die hoender deur hom met ’n skerp skêr in die lengte aan albei kante van die rugstring deur te knip. Lig die rugstring uit en druk die hoender met jou palm plat.
2 Meng die rissie, paprika, knoffel, sout, koljander, asyn, peper en ’n ¼ koppie olyfolie saam. Vryf die hoender deeglik met die helfte van die marinade in en hou die res eenkant.
3 Smeer die orige ¼ koppie olyfolie oor die broodsnye en braai die brood op die rooster tot bros. Pak die brood in ’n enkellaag onderin ’n plat bak. Braai die suurlemoenhalwes met die oop kant na onder tot dit gekaramelliseer is met skroeimerke. Pak dit ook in die bak.
4 Braai die plathoender oor matige kole tot gaar – dit sal ongeveer 45 minute neem. Onthou om die heeltyd van die oorblywende marinade aan te smeer.
5 Laat die hoender vir 15 minute in die bak bo-op die brood rus, en sprinkel dan die pietersielie oor. Sny die hoender in porsies en sit dit voor met die brood en ’n skeut van die suurlemoensap.
Weg Ry & Sleep sê Hou die jammerlappie byderhand vir dié souserige affêre.