Kromrivier-rooivlerkie
Pseudobarbus senticeps
Die Kromrivier-rooivlerkie is jare gelede die eerste keer deur die selakantkenner J.L.B. Smith opgeteken. Hy het ’n rooivlerkiespesie in die Kromrivierstelsel in die Oos-Kaap beskryf en dit die
Barbus senticeps genoem. Maar dié spesie is later geïdentifiseer as dieselfde vis as die Oos-Kaapse-rooivlerkie ( Pseudobarbus afer). Onlangse navorsing het gewys Smith se rooivlerkie is inderdaad ’n spesie in eie reg.
Ná die bykomende rooivlerkiestudies van dr. Albert Chakona en prof. Paul Skelton wat in die ZooKeys- joernaal gepubliseer is, heet die vis nou amptelik Pseudobarbus senticeps.
Grootte en biologie Dié rooivlerkie se broeipatroon is nog duister, maar dit stem waarskynlik ooreen met dié van soortgelyke visse. Hulle broei dus waarskynlik in die somer, en waterinsekte is bo-aan hulle spyskaart. Verdere studies sal meer lig werp op eetpatrone.
Habitat Die Kromrivier-rooivlerkie is endemies aan die Kromrivierstelsel wat by St. Francisbaai in die see uitmond. Hulle habitat vandag is beperk tot plekke waar visse van elders nog nie oorgeneem het nie, en plekke wat nog nie ontwikkel is nie. Hulle kom in standhoudende strome voor waarvan die water kan wissel van skoon tot moerasagtige waters met ’n wisselende omgewing (van groter rotse tot klein klippies). Die Kromrivierrooivlerkie het waarskynlik ook in die hoofstroomdele van die Kromrivier voorgekom, maar visse van ander omgewings het die gebiede oorgeneem.
Vang hulle só Dis ’n vis wat tipies deur kunsvlieghengelaars geteiken word, terwyl wetenskaplikes nette gebruik om hom te vang. Met ’n snorkel en bril kan jy hulle in die Kaapse blommestreek ook van nader sien. Sit hulle asseblief lewendig terug in die water as jy een vang – ook op dieselfde plek. Moet hulle nie van die een na ’n volgende opvangsgebied verskuif nie, want hulle kan verbaster.
Dis ’n rekord Die grootste opgetekende Kromrivier-rooivlerkie is 8 cm lank. SASSI-status Hulle word tans gelys as ’n kritiek bedreigde spesie, wat beteken die vis loop die gevaar om uit te sterf. Indringervis is een van die grootste gevare asook habitat wat agteruitgaan – én die mens se gebruik van ondergrondse water.