Kruger: Weg met tweerigtingradio’s

Ons was in die Julievakansie die vierde jaar agtereenvolgens in die Krugerwildtuin. Ons verblyf was weer eens ongelooflik en die personeel vriendelik en behulpsaam.

Die enigste laagtepunt was die gedrag van die derdeparty-oopsafarivoertuie. Ons het in ’n stadium ’n trop leeus dopgehou wat buffels jag. Ons was vyf voertuie waaronder een safarivoertuig (dit was nie die park s’n nie). Die gids was gedurig op sy tweerigtingradio om sy kollegas te roep, en binne ’n paar minute was daar agt safarivoertuie! Hulle het met groot stofwolke daar aangejaag gekom en een voertuig het tussen ’n trop swartwitpense ingejaag – teen seker 80 km/h op die grondpad! Dit was ’n groot rumoer en uiteindelik het ons (en die leeus) padgegee. Ek verstaan heeltemal die diens wat dié voertuie aan die publiek en veral buitelandse toeriste bied en ondersteun dit ook, want dit is goed vir die ekonomie van die park en die omgewing.

Maar kan ’n mens nie die tweerigtingradio’s verbied nie? Dit sal verseker dat almal hulle eie wild soek en die voertuiglading sal beter versprei wees.

Dit sal verhoed dat voertuie na plekke toe jaag wat mens en dier onnodig in gevaar stel en ’n negatiewe indruk op “gewone” toeriste laat.

PIETER VAN DER MERWE, Paarl

LAURA LUKMEVHO, mediabeampte van die Krugerwildtuin, antwoord: Ons keur die gebruik van tweerigtingradio’s deur safarigidse op soek na wild ten sterkste af. Dit lei tot slegte gedrag, ’n jaery, padwoede en die opeenhoping van voertuie. Ongelukkig kan ons nie die radio’s verbied nie – dit is ’n noodsaaklike veiligheidsmaatreël. Die gidse aanvaar volle verantwoordelikheid vir hulle gaste en moet tydens ’n noodgeval met hoofkantoor kan kommunikeer.

Lees op bl. 28 hoe jy ’n safarigids wat sy radio misbruik, kan rapporteer.