Cabernet sauvignon vir winteraande
Trooskos en ’n bottel goeie rooiwyn is die beste bestanddele vir ’n winteraand tuis. Sit nog ’n paar vriende en bordspeletjies daarby en ek twyfel of ek ooit my neus by die deur sal uitsteek!
Vandeesmaand kyk ons na drie cabernet sauvignons van regoor die prysspektrum om saam met Aletta se smaaklike pasta te geniet. Hopelik kry jy die regte kombinasie – een wat jou pasta én jou sak pas!
Ons begin met die duurste wyn – hoewel R128 eintlik ’n baie redelike prys vir rooiwyn van dié gehalte is... Die Kleine Zalze Vineyard Selection 2015 Cabernet Sauvignon is sag en ryp, met heelwat fluweelsagte tannien wat die wyn ruggraat gee.
Dit sal die beste werk saam met ’n vleispasta – die suurheid sal deur ’n ryk sous sny en ook ’n goeie teenwig wees vir souterige parmesaankaas.
Die volgende wyn is die Graham Beck The Game Reserve Cabernet Sauvignon 2014 (R85). Sedert dié wyn gebottel is, is die Graham Beck-handelsmerk aan die Rooiberg-kelder verkoop. Voortaan sal vonkelwyn die enigste Graham Beck wees wat jy kan koop. Dit maak nie saak nie – hierdie bly ’n lekker cabernet sauvignon teen ’n baie goeie prys, vol swart vrugte met tikkies tamatieblaar en ’n titsel vanielje in die nasmaak.
Die derde cabernet sauvignon is die Welmoed Cabernet Sauvignon 2015 (R50) – ’n fantastiese opsie teen dié prys. Hier’s heelwat karakter: swart vrugte, leer- en sedersmake – alles in ’n sagte, sappige mond vol. Dis ideaal vir die winter!
– Cathy Marston