TOERUSTING
Is jy ’n kranige stapper wat jou tandeborselsteel afsny om gewig te spaar of ’n dagbesoeker met ’n honger gesin? Jy hoef nie swaar te dra of honger te ly nie.
Om lekker te kuier wil ’n mens ook lekker kan eet. Hier is ’n paar toerustingstukke wat kosmaak in die buitelug maklik maak
1 Jetboil MiniMo
Enige gasstofie kan water kook vir ’n beker kitskoffie of ’n bakkie ProNutro... Maar as jy ingewikkelde resepte wil volg wat noukeurige beheer oor die vlam verg, gaan jy nie maklik beter kry as JetBoil se MiniMo nie. Dié stofie se pot is groot genoeg vir een maaltyd, maar daar is groter modelle beskikbaar as jou stapmaat wil saam smul. Gewig 415 g Afmetings 152 x 127 x 127 mm (toegevou) R3 250 by
2 Vango Hawthorntafel
As jy al in sneeu of modder gekamp het, sal jy saamstem dat ’n plat, skoon oppervlak waarop jy kan kosmaak goud werd is. Hierdie kompakte tafeltjie van aluminium werk ook goed as ’n bedkassie en sy glywerende oppervlak keer dat jou blikkie soetmielies afgly en op die grond beland. Hy vou klein weg in sy eie sakkie. Gewig 760 g Afmetings 400 x 90 x 65 mm (toegevou) R500 by rammountain.co.za
3 Blue Sky Sporktacular 2.0
Waarom sou jy hierdie aardige lepelding gebruik? Wel, dit bespaar gewig en dis ’n mes, lepel en vurk in een. Die saagtandlem sny maklik deur groente en vrugte, maar hy sukkel met ’n dik stuk vleis. Elegant is hy beslis nie – die lepelkant is te breed om in jou mond te pas – maar hy word gemaak van “gesonde plastiek” (dus geen Bisphenol A, oftewel BPA, nie) en jy kan hom in ’n skottelgoedwasmasjien laai. Gewig 20 g Afmetings 260 x 25 x 15 mm R50 by Cape Union Mart
4 Leatherman Juice S2
Jagters en Jopie Adam het ’n hoërgraad-mesmoertang nodig, maar doodgewone stappers kan met goedkoper toerusting klaarkom. Die 12 implemente in hierdie gereedskapstuk is voldoende om die meeste probleme op jou wandelpad op te los. Jy kry die gebruiklike tangetjie, skêr, mes, skroewedraaiers en ’n botteloopmaker. Ons hou van die Juice oor sy klein afmetings en relatiewe ligte gewig. Gewig 145 g Afmetings 82 x 31 x 13,5 mm (toegevou) R1 350 by Cape Union Mart
5 GSI Javamill
Min dinge veroorsaak soveel afwagting soos die krts-krts-klanke van ’n meultjie wat koffiebone maal. Hierdie piepklein meul is van ’n soort poliëster gemaak wat geen skadelike plastiek bevat nie. Die bone word deur ’n keramiekmeul verkrummel eerder as deur lemme gekerf. Koffiekenners reken hierdie metode sorg vir die heel lekkerste boeretroos in jou koppie. Gewig 265 g Afmetings 160 x 51 x 64 mm R695 by rammountain.co.za
6 360°-kamppotte vir twee
Hierdie stel bestaan uit twee potte en ’n braaipan wat ook kan diens doen as ’n deksel vir die groter pot. Jy kry ook twee plastiekbekertjies en twee kleinerige plastiekbakkies. Alles pas in mekaar en ’n strop keer dat die stel in jou rugsak uitmekaarval en kliphard klingel terwyl jy die silent Alexandriastaproete in stilte aanpak. Gewig 620 g Afmetings 200 x 120 mm (verpak) R700 by Outdoor Warehouse
7 Sea to Summit X-pot
Hierdie 2,8 ℓ-pot vou plat soos ’n (baie dik) pannekoek. Hy het twee silikoonhandvatsels wat aan die deksel kan vasknyp. Dit kom handig te pas as die pot – en jou kosbare hoenderkerrie daarbinne – van die gasstofie af val.
Die aluminiumboom raak vinnig warm, maar koel ook gou af. Dis ’n belangrike eienskap wat keer dat jy per ongeluk ’n koeëlronde gat in jou tent se grondseil laat smelt. Gewig 350 g Afmetings 215 x 37 mm (platgevou) R995 by Outdoor Warehouse en
driftersadventurecentre.co.za
8 TrailBoss Xplorerlantern
Kopliggies is ’n uitstekende uitvindsel, maar ’n lantern is ’n gerusstellende baken in ’n donker nag. Die LED-liggies is suinig met batterykrag en die bene vou plat sodat jy dit as ’n gewone flits kan gebruik. Die 130 lumens is te flou om jou hele kampplek te verlig, maar voldoende vir ’n kamptafel of om jou tent te verlig. Gewig 320 g Afmetings 150 x 80 mm (toegevou) R160 by Outdoor Warehouse
9 GSI Glacier Stainless 6 Cup Perc
Binne hierdie oënskynlik doodgewone keteltjie is ’n perkoleermandjie groot genoeg vir ses bekers moerkoffie. Maak die koffie stadig warm, anders gaan dit aanbrand. Sodra die koffie donkerbruin borrels maak wat een keer elke twee sekondes bars, kan jy die bekers regsit. Jy kan ook die mandjie uithaal en siedaar: ’n Teepot. Gewig 568 g Afmetings 203 x 124 x 163 mm R715 by rammountain.co.za >