PIET VAN STAADEN

van Welgelegen skryf: Ek het dié diertjie afgeneem in die Mapungubwe- nasionale park. Nadat ek ’n paar bronne geraadpleeg het, dink ek dis ’n boomdassie. Maar volgens my verwysings kom hulle nie in daardie omgewing voor nie. Kan iemand help?

LETSIE COETZEE van die Mapungubwenasionale park antwoord: Dankie vir die mooi foto, Piet. Dit is wel ’n geelkoldassie en nie ’n boomdassie nie.

Dié spesie het groot individuele kleurverskille. En daar is drie breë kleurvorme vir die verskillende streke waarin hulle voorkom. Die grys voorkoms met wit maag – soos op die foto – is byvoorbeeld meer kenmerkend van die “Zimbabwe”-kleurvorm. Die wit kolle bo die oë is ook ’n kenmerk van die geelkoldassie, maar nie van die klip- of boomdassie nie. ’n Boomdassie het ’n wit of naaswit kol op die rug, wat nie hier die geval is nie.