KRY JOU OOG OP DIE BAL
Begin deur vóór jy in die pad val, jou kar se gewone truspieëls te verstel sodat jy behoorlik kan sien wat agter jou aangaan. (Moet nooit jou spieëltjies verstel terwyl jy ry nie.) Die gedagte is dat jy al drie jou truspieëls – die regterkantse, linkerkantse en middelste een – só rig dat jy die wydste visie na agter het, maar steeds die blindekolle tot die minimum beperk.
Die syspieëls moet só gestel word dat jy net-net nie die bakwerk van jou ryding kan sien nie – as jy heelwat van jou kar – of jouself – in die syspieëls sien, is hulle te nou gestel en kry jy groot blindekolle aan weerskante van die kar. Met jou binnespieël moet jou hele agterruit in sig wees.