Àrd-sgoil Àird nam Murchan soirbheachail aig Duaisean Foghlaim na h-Alba

THA Bòrd na Gàidhlig a’ cur meal-a-naidheachd air Àrd-sgoil Àird nam Murchan a bhuannaich Duais Foghlam Gàidhlig aig Duaisean Foghlaim na h-Alba 2017.

Chaidh sgioba luchdteagaisg, luchd-taice agus pàrantan Àrd-sgoil Àird nam Murchan a mholadh gu mòr airson na tha iad a’ dèanamh leis an òigridh airson cultar na Gàidhlig, agus dualchas na sgìre, a leasachadh agus a bhrosnachadh air feadh na coimhearsnachd.

Am measg na tha òigridh na sgoile a’ dèanamh tha iad a’ gabhail pàirt ann an Duaisean John Muir, cèilidhean, Deasbad Nàiseanta nan Sgoiltean, farpais FilmG agus camanachd far a bheil iad a’ faighinn barrachd eòlais air a bhith ag ionnsachadh agus far a bheil iad a’ leasachadh nan sgilean Gàidhlig aca. Leis a bhith an sàs anns na diofair phròiseactan, tha iad a’ faighinn buannachd mhòr a-mach a bhith coinneachadh ri agus a’ dèanamh càirdeas le daoine òga eile bho air feadh Alba.

Le stiùireadh làidir bho Cheannard na sgoile agus le taic bho na tidsearan, luchd- obrach eile agus pàrantan tha Gàidhlig san sgìre a’ dol bho neart gu neart agus tha seo na adhbhar toileachais mhòir a rèir Mona Wilson, Stiùiriche Foghlam na Gàidhlig aig Bòrd na Gàidhlig.

A’ bruidhinn às leth Bhòrd na Gàidhlig thuirt a’ Bhean-phòsta Wilson: ‘Tha sinn airson meal-a-naidheachd a chur air a h-uile duine co- cheangailte ri ÀrdSgoil Àird nam Murchan a tha aig cridhe na coimhearsnachd agus a tha gu math airidh air an duais chliùiteach seo a bhuannachadh.’

Thòisich Duaisean Foghlaim na h-Alba ann an 2001 agus tha iad air an cur air dòigh leis an

Daily Record agus Foghlam Alba le taic bho bhuidhnean mar Bhòrd na Gàidhlig agus Alba Chruthachail.

Crìoch Airson tuilleadh fiosrachaidh mun bhrath-naidheachd seo cuiribh fios gu Murchadh Moireasdan Manaidsear Conaltraidh agus Thachartasan (Sealach) aig Bòrd na Gàidhlig, air post- d murchadh@ gaidhlig. scot no air a’ fòn 01463 225454.