Ku është libri “Historia e Partisë së Punës së Shqipërisë”?

Dërguar me email

Në libraritë e shumëllojta moderne e të thjeshta të tiranës,(ku gjallon popullsia më e madhe qytetëse e vendit), telefonisht e me internet, në rrugë, parvaze urash, rrëzë gardheve të hekurta e kangjellave institucionale, nëpër cepe pallatesh e ndën hije të pemëve zogjshumë, shiten vandakë librash, nga më të ndryshmit. Është një çudi shqiptare e kësaj kohe të turbullt ku gjen ngado fare lehtë librat që i kushtohen a.Hitlerit dhe a.Zogut, d.Musolinit dhe Uinston Çurçillit, etj, por nuk gjen dot një libër për Historinë e Partisë së Punës së Shqipërisë, që krijoi Enver Hoxha me disa shokë komunistë më tetë nëntor 1941! Pse nuk e nxjerr në treg shteti apo privati këtë libër? Janë disa lloj-soj përgjigjesh, por mua më duket më afër së vërtetës kjo: sepse kanë frikë! Shteti ka frikë nga populli, nga Enveri e nga amerikani, kurse privati ka frikë nga shteti. Shpresoj të mos jem i gabuar mbasi duket ashiqare që populli ynë i martirizuar nga pushtimi fashist e nazist, kreu veprat transformuese industriale e bujqësore, kulturore e shpirtërore madhore, duke pasur udhëheqëse vetëm Partinë e Punës. Ndaj ajo ishte dhe mbetet aq e madhe si në ato 44 vjet që e drejtoi E.Hoxha, ashtu edhe sot pas tetëdhjetë vitesh. Ne ndriçohemi nga ajo dritë hidrocentralesh; nga ajo tokë bujqësore hamë bukë e realizojmë eksporte; nga ato miniera majmen disa të huaj e ushqehen sa e sa të varfër në Bulqizë, e gjetiu... ajo parti ishte saktësisht organizatë shoqërore masive cilësore e nivelit më të lartë të mundshëm të organizimit shoqëror. Në të hyje vullnetarisht , njihje dhe zbatoje rregullisht së pari, detyrat që të caktonte statuti dhe pastaj kërkoje të përfitoje plotësisht të drejtat që të jepte po ai statut. ajo ishte organizatë pararojë e të tjerave dhe tërë shoqërisë. ato motive revolucionare, atdhetare, morale për punë, kulturë dhe mbrojtje që ushqente tek çdo njeri i ndershëm ai statut e ajo parti, nuk arrihen më. Shumica dërmuese e popullit shqiptar e donte partinë e punës sepse ajo e nxori në dritë: solli çlirimin e plotë të vendit pa u futur asnjë këmbë ushtari i huaj për ndihmë, zhduku analfabetizmin, malarjen, sifilizin, lipsat, kënetat, dhe solli qytetërim e civilizim human të barazpeshuar e në ngjitje. ajo lartvlerësoi dëshmorët, veteranët, invalidët e Luftës antifashiste Nacional Çlirimtare dhe të punës ndërtimtare socialiste. ajo parti qe historikisht e mbetet forca e vetme mobilizuese, sqaruese, udhëheqëse për të lëvizur përpara drejt barazisë në jetën e kohëve moderne të të gjithë popullsisë shqiptare. Vështirë është se do të gjendet ndonjë parti tjetër e çdo kohe që mund t›i afrohet sadopak! Përse të mos e njohin brezat e lindur pas viteve 1990 historinë e asaj partie? Ku e gjen të drejtën cilido kryetar qeverie apo ministër që me vendim heq nga programet shkollore mundësinë e njohjes së pjesëve më jetëdhënëse të historisë sonë? Pse censurohet historia e saj? a nuk është ky antishqiptarizëm? Po tani, në këto 30 vjet cila parti po e udhëheq ecurinë shqiptare? Pd që sulmon parlamentin me bomba dhe një tufë hajdutësh marrin nëpër këmbë gjithçka shqiptare apo PS që me koncesione ia ka shitur vendin të huajve? ato, s›janë veçse e «njëjta bajgë e ndarë në dy pjesë»! apo partiçkat e tjera false? Është për të vënë kujën kur mendon se në Shqipëri listohen si subjekte 94 parti! Mendoj se brezat e rinj, të pas viteve 1990 është e domosdoshme që të njohin mirë historinë e 45 viteve të rendit ekonomiko-shoqëror socialist. Po ashtu duhet të njohin edhe» të metat dhe mbrapshtitë « e komunizmit që ne realisht jetuam e jo ato që trumbeton nipi ballistëve e kolaboracionistëve si ata të Butkës, Prek calit, isa toskës, Mit›hat Frashërit, etj.etj. Për ta mbyllur: është koha që historia e asaj partie të njihet e të studiohet në të gjithë format e mundshme legale dhe ilegale që mundëson teknologjia dhe ndërgjegjja shoqërore me qëllim që duke njohur të vërtetën historike të së kaluarës sonë të dimë të zgjedhim drejt rrugën e së ardhmes. qoftë ky vit jubilar, pikënisje e kësaj pune vigane për njohjen e saktë të asaj partie që ndriçoi ndër shekuj historinë e popullit dhe vendit tonë.

Ilmi S.Qazimi