Diplomatja amerikane rithekson mbështetjen e fortë për uniformat blu dhe kreun e ri të saj. Nano premton se Policia e Shtetit do të jetë në nivelet më të larta, për të luftuar krimin e organizuar dhe korrupsionin dhe se kjo luftë nuk bëhet vetëm
ambasadorja amerikane në tiranë, Yuri Kim, zhvilloi dje takimin e parë me drejtorin e ri të Përgjithshëm të Policisë së Shtetit, Gledis Nano, që prej ditës së marrjes së këtij posti. Pas takimit dypalësh që u mbajt pa prezencën e mediave, kryepolici Nano falënderoi SHBa-të për mbështetjen dhe u shpreh se lufta ndaj krimit e korrupsionit nuk mund të bëhet asnjëherë vetëm dhe se do punonin së bashku për t’ia dalë, me qëllim për të pasur më shumë siguri e rend në vend.
“Sapo zhvilluam një takim me zonjën ambasadore. takimi u krye në kuadër të bashkëpunimit që Policika e Shtetit ka me të gjitha agjencitë ligjzbatuese të Shteteve të Bashkuara, si partneri ynë strategjik. Ne kemi mbështetje të plotë nga SHBa dhe i sigurova ambasadores se Policia e Shtetit do të jetë në nivelet më të larta të performancës, për të luftuar krimin dhe korrupsionin. Kjo është një luftë që nuk bëhet asnjëherë vetëm. Unë jam i bindur që bashkë do t’ia dalim, për të pasur rend dhe siguri më tepër në vendin tonë”, tha Nano.
Nga ana e saj, ambasadorja Kim rikonfirmoi edhe një herë mbështetjen e SHBa-ve për policinë shqiptare në punën e saj.
“Kisha një takim shumë të mirë këtë mëngjes me zotin Nano. Erdha për t›i uruar për pozicionin e ri. Për ne bashkëpunimi i ngushtë mes SHBa dhe Shqipërisë për ligjzbatimin mbetet i fortë. Ne do të vazhdojmë të jemi pranë, me të gjithë ndihmën që është e mundur.
Zoti Nano dhe unë jemi të dy mbështetës të fortë të prezencës së policisë”, tha Kim.
Një nga arsyet e përzgjedhjes së Nanos në krye të uniformave blu ishin edhe marrëdhëniet e mira në rrugë zyrtare që ka pasur me partnerët amerikanë, në disa prej operacioneve që zhvilloi ndër vite si shef i Zyrës së antiterrorit.