Rama para policëve: Satelitët, inspektorë në orbitë! Do të ulim sërish moshën e uniformave blu
Teknologjia ishte kryefjala gjatë prezantimit të buxhetit para Policisë së Shtetit nga ana e Kryeministrit Edi Rama. Ai u ndal te plani për hedhjen e dy satelitëve në orbitë dhe te dronët inteligjentë si dy mekanizmat që do të forcojnë kontrollin mbi territor dhe goditjen e paligjshmërisë.
Rama tha se sateliti i parë, që pritet të hidhet në orbitë në muajin mars do të jetë “inspektori” i pakorruptuar, që do t’i ofrojë Policisë së Shtetit informacione nga paligjshmëria me ndërtimet, te kultivimi i lëndëve narkotike. Këtij qëllimi, deklaroi Kryeministri do t’i shërbejnë edhe dronët inteligjentë.
“Satelitët dhe dronët inteligjentë do të jenë mekanizma për Policinë e Shtetit. Nuk janë të parashikuara në buxhet, por janë investime masive që ndryshojnë komplet kapacitetin e mbledhjes së informacionit të Policisë së Shtetit. Mes prioriteteve Rama identifikoi edhe rritjen e kapaciteteve kundër krimit financiar, atij kibernetik dhe rritjen e cilësisë së shkollimit në Akademinë e Sigurisë. Për të parën tha se Policisë së Shtetit do t’i shërbejë edhe një qendër e re kundër krimit kibernetik që po ngrihet nga Ministria e Mbrojtjes.
“Te krimi financiar dhe ai kibernetik janë fusha ku jemi shumë mbrapa. Këtu do të shërbejë një tjetër investim i rëndësishëm, që është qendra e re që do të ndërtohet nga Ministria e Mbrojtjes kundër krimit kibernetik, që do të jetë një qendër e nivelit më të lartë teknologjisë”, tha ai.
Kreu i Qeverisë u shpreh se ka ende nevojë për uljen e moshës mesatare në Policinë e Shtetit. Këtu nënkuptoi një bashkëpunim mes policisë dhe Illyrian Guard, shoqërisë së ngritur nga Ministria e Brendshme për ofrimin e sigurisë fizike, që efektivët që do të lirohen nga radhët e policisë të mund të punojnë për këtë shoqëri.
“Duhet ulur edhe më shumë mosha mesatare në Policinë e Shtetit. Duhe të shohim raportin mes Policisë së Shtetit dhe Illyrian Guard. Ajo duhet të jetë në dispozicion të Policisë së Shtetit dhe punonjësit e
Policisë së Shtetit mund të spostohen për t’u transferuar në një punë më komode. Duhet ta bëjmë Akademinë e Sigurisë më tërheqëse”, tha ai.
Rama cilësoi si të patolerueshme shfaqjet e keqtrajtimeve në radhët e Policisë së Shtetit, duke iu referuar rastit më të fundit ndaj gazetares Anila Hoxha.
“Të theksohet për të gjithë nga ana e drejtuesve të policisë domosdoshmëria që të mbahet parasysh që figura e Policisë së Shtetit nuk ka nevojë për asnjë gjest e fjalë të tepërt. Uniforma e policisë është mishërimi i ligjit dhe ligji nuk flet, ligji nuk bërtet, nuk shan. Ligji vepron”, tha Rama.