SPAK kthen përmbys Kadastrat, u tjetërsuan tokat në Lalëz dhe Dhërmi
Hetuesit bastisin shtëpitë e shefit dhe 7 punonjësve të Kadastrës së Durrësit, merren të gjithë nën hetim. Nën sekuestro 190 mijë m2 tokë në Hamallaj dhe Gjirin e Lalëzit, dyshohet se u tjetërsua me dokumente false, hetimet nisën që në vitin 2019. SPAK prangos edhe zyrtarin e katërt për skandalin e tokave në Dhërmi, i ndaluari është topografi i Bashkisë Himarë
abuzimi me tokat e bregdetit të Hamallajt, Gjirit të Lalëzit dhe dhërmiut, duke i tjetërsuar nëpërmjet falsifikimit të dokumentacioneve, ka hedhur Prokurorinë e Posaçme në një operacion masiv në Durrës dhe Vlorë gjatë ditës së djeshme. Përmes këtij aksioni të befasishëm, SPaK ka ushtruar kontrolle në banesat e 7 punonjësve të Kadastrës së durrësit, përfshirë shtëpinë e ish-regjistruesit të këtij institucioni, Bedri Luku, i cili pasi është shoqëruar në polici, është lënë që të hetohet në gjendje të lirë.
Kontrolli është ushtruar në banesat e punonjësve të Kadastrës Vlash Brahja, Altin Haruni, Agron Bejdolli, Lisandër Xhizdari, Asllan Arapaj, si dhe Ber Begeja, të gjithë nën akuzë për shpërdorim detyre. Zyrtarët e Kadastrës kanë mbajtur të gjithë qëndrime mohuese, duke thënë se nuk janë të përfshirë në tjetërsimin e tokave në zonën e Gjirit të Lalëzit.
Mësohet se procedimi ka nisur në vitin 2020 nga SPAK, për falsifikim të pronave në Hamallaj dhe në Gjirin e Lalzit. Zyrtarët e arrestuar po hetohen për veprat penale të korrupsionit, shpërdorimit të detyrës, falsifikimit të dokumenteve dhe grupit të strukturuar kriminal.
Sipas të dhënave paraprake, mësohet se bëhet fjalë për një hetim të regjistruar nga ish-Prokuroria për Krime të Rënda në vitin 2019 dhe hetimet kanë vijuar më pas nga SPAK. Pas operacionit të kësaj të marte, SPAK vendosi nën sekuestro edhe 190 mijë metra katrorë tokë në zonën e Gjirit të Lalzit, që nga hetimet rezultojnë të tjetërsuara.
Dhërmi, shkon në 4 numri i zyrtarëve të arrestuar! Në pranga dhe topografi i Bashkisë Himarë
Hetimet për tjetërsimin e pronave në dhërmi kanë çuar në pranga dje edhe topografin e Bashkisë Himarë. Mësohet se është arrestuar Elton Marko, 41 vjeç, i cili dyshohet se ka falsifikuar formularin e Aktit të Marrjes së Tokës në Pronësi, të cilin e ka përdorur për regjistrimin e një pasurie në fshatin dhërmi dhe më pas e ka shitur tek persona të tjerë. Kujtojmë se më herët, nën dyshimin e falsifikimit të dokumenteve dhe tjetërsimit të pronave në Dhërmi, u arrestuan drejtori i administrimit e Mbrojtjes së Tokës në Vlorë, Bardhyl Gjika, specialisti i kësaj drejtorie, Kreshnik Mino dhe ish-kreu i kadastrës së Vlorës, Klodjan Troci. Gjika dhe Troci ndodhen në burg, ndërsa Mino u la nga gjykata në arrest shtëpie. Sipas hetimeve, në bashkëpunim me njëri-tjetrin, ata kanë falsifikuar dokumente arkivorë të pronësisë, si tapi pronësie apo përdorimi për banorë të fshatrave Himarë e Dhërmi, etj., të Bashkisë Himarë. Ndërkohë, për shkak të frikës nga drejtësia si pasojë e shkeljeve të shumta të bëra, ata inskenuan edhe një vjedhje në zyrat e Këshillit të Qarkut në Vlorë, ku u morën dy dosje për pronat në dhërmi, skemë që u zbulua më pas nga Policia, duke nxjerrë në dritë historinë e falsifikimeve dhe tjetërsimit të pronave që vijonte nga viti 2019. I ndaluar për këtë rast është edhe një banor i Dhërmiut, në rolin e përfituesit.