“Skema” prangos 5 persona, zhvatën 6 mln euro me rimbursime
Prokuroria e Durrësit dhe Drejtoria e Tatimeve zbulojnë mekanizmin se si pesë kompanitë përvetësonin me fatura fiktive prej vitit 2016 miliona euro. Gjykata jep 7 masa me burg dhe 3 detyrim paraqitjeje, 2 biznesmenë janë shpallur në kërkim. Sekuestrohen asete të firmave të akuzuara, me vlerë tregu 2 mln euro. Kush janë të ndaluarit dhe kompanitë e implikuara
Një tjetër skemë mashtrimi me tVSH-në dhe rimbursimin nga shteti me fatura fiktive është zbuluar nga organet ligjzbatuese në Durrës. Pesë persona u arrestuan nga policia vendore, me urdhër të Prokurorisë së Rrethit, teksa në total janë 10 persona të akuzuar, për një dëm prej 6 mln euro. Gjykata ka dhënë 10 masa sigurie, 7 me “arrest me burg” dhe 3 “detyrim paraqitjeje”.
Deri tani janë vë në pranga Regan Merdani, Enis Xhaferri, Ben Caka, Ali Agolli dhe Roland Avdo. Prokuroria kishte nisur hetimet që prej disa muajsh, por dyshohet se janë 5 kompani të përfshira në këtë skemë abuzive, me aktivitet që nga viti 2016. Bëhet fjalë për një skemë mashtrimi që konsiston në krijimin e 5 subjekteve private thuajse fantazmë, me qëllim shmangien e detyrimeve fiskale, teksa administratorë dhe punonjës firmash plotësonin fatura fiktive.
Mes personave të arrestuar është pronari i kompanisë së hekur-Nikelit që vepron në zonën e Bilishtit, “Alfa Nikel”, e cila është sekuestruar. Personi i arrestuar quhet Ali Agolli, i cili dyshohet se ka kryer fatura fiktive, me qëllimin e vetëm për përfitim të rimbursimit me TVSH-në.
Sipas njoftimit zyrtar, bëhet me dije se personat e arrestuar në bashkëpunim me njeri-tjetrin, kanë krijuar shoqëri fiktive, me qëllim mospagimin e detyrimeve tatimore, ndërkohe që kryenin punime në fushën e ndërtimit dhe fusha të tjera, të padeklaruara në organet tatimore, produkte të cilat janë blerë pa dokumente tatimore, si dhe punimet janë kryer nga punonjës të paregjistruar dhe pa deklaruar në organin tatimor.
Gjithashtu prokuroria njofton se nga hetimet financiare të kryera gjatë hetimit proaktiv penal, është bërë e mundur indetifikimi dhe sekuestrimi i aseteve të mëposhtme: Një shoqëri e quajtur “Alfa Nikel”, në vlerën 1,2 mln euro, në emër të shetatsit A.A., një hidrocentral me një siperfaqe 700 m² truall, në Dhërmi, në emër të A.Xh., një apartament me sipërfaqe 215 m², në Vlorë, në emër të shtetasit E.Xh. Veprimet hetimore po vazhdojnë për identifikim dhe sekuestrimin e pasurive të tjera, të përfituara nga ky aktivitet krimina
Në këtë operacion të koduar “Skema” ka marrë pjesë edhe drejtoria tatimore e durrësit, si dhe policitë e Tiranës, Vlorës dhe Durrësit. Policia sqaroi se kompanitë e implikuara në këtë mashtrim me qëllime përfitimi janë; “TGV&T-2014” sh.p.k, “Xhevi Inert”, “VLORA INVEST”, SG LOGISTIC, si dhe «R. B.-GENERAL SERVIS», vlera e të cilave paraprakisht kalon 2 milionë euro. Aktualisht policia është vënë në kërkim të dy biznesmenëve që nuk u gjetën në banesa dhe kanë masat “arrest me burg” nga gjykata.