Dje shifra alarmante të infektuarish, regjistrohen edhe 4 viktima
PËRKEQËSOHET GJENDJA\NË RRITJE EDHE NUMRI I TË SHTRUARVE NË SPITALE, KU AKTUALISHT PO TRAJTOHEN 182 PACIENTË, 19 PREJ TË CILËVE NDODHEN NË GJENDJE TË RËNDUAR
Strukturat e shëndetit publik kanë raportuar një rritje alarmante të infektimeve me Covid-19. Përgjatë 24 orëve të fundit, shifrat janë pothuajse katërfishuar në krhasim me të ato të ditës së hënë. Nga testimet e kryera tek rastet e dyshuara në të gjithë vendin gjatë ditës së djeshme është bërë e ditur se edhe 770 pacientë të rinj shtohen në listën e të infektuarve me koronavirus. Ndërkohë që ka pasur edhe katër humbje jete në radhët e të moshuarve, duke e çuar kështu në 2970 numrin total të viktimave të regjistruara që nga nisja e pandemisë në vend. Mjaft shqetësuese raportohet të jetë edhe gjendja me shtrimet në spitale ku shifrat vijojnë të jenë në rritje, teksa me dhjetëra pacientë janë në gjendje të rënduar.
Sa i takon gjurmimit të rasteve të reja, në 24 orët e shkuara në të gjithë vendin janë kryer 3393 testime, nga të cilat kanë rezultuar pozitivë me koronavirus, 770 qytetarë në këto bashki: 310 në Tiranë, 40 në Shkodër, 39 në Fier, 33 në Berat, Elbasan, 27 në Korçë, 26 në Kamëz, 24 në Vlorë, Sarandë, 21 në Durrës, 18 në Mallakastër, Gjirokastër, 17 në Kurbin, Lushnje, 15 në Dimal, 9 në Kavajë, 8 në Lezhë, 7 në Krujë, Roskovec, 6 në Pogradec, 5 në Vorë, Kuçovë, 4 në Kukës, Patos, Dropull, Devoll, Gramsh, 3 në Dibër, Divjakë, Himarë, Skrapar, Poliçan, Librazhd, 2 në Fushë- Arrëz, Mirditë, Tepelenë, Kolonjë, 1 në Malësi e Madhe, Tropojë, Has, Shijak, Klos, Selenicë, Delvinë, Finiq, Libohovë, Përmet, Këlcyrë, Memaliaj, Maliq, Cërrik, Peqin.
Aktualisht janë 8,157 pacientë aktivë me Covid-19 në të gjithë vendin, ku në spitalet Covid po marrin trajtim 182 pacientë, nga të cilët 19 janë në gjendje më të rënduar. “Me gjithë përpjekjet e mjekëve, në 24 orët e fundit ka 4 humbje jete me Sars-Cov2 pozitiv: Një qytetare 64 vjeç nga Libofsha, një qytetare nga Berati 65 vjeç, një qytetar nga Kuçova 72 vjeç, një qytetare nga Tirana 81 vjeç”, raportoi gjatë ditës së djeshme Ministria e Shëndetësisë dhe Mbrojtjes Sociale. Në 24 orët e shkuara janë shëruar edhe 621 qytetarë, duke e çuar numrin e të shëruarve në 178,998 që nga fillimi i epidemisë.
E ndërsa situata në vend vijon të jetë e rënduar, Ministria e Shëndetësisë dhe Mbrojtjes Sociale u bën apel qytetarëve që të vaksinohen sa më parë, për të mbrojtur veten dhe shëndetin e të tjerëve. Çdo qytetar mbi 16 vjeç, mund të vaksinohet në qendrën shëndetësore ose në pikën më të afërt të vaksinimit të përqëndruar. Vaksinat antiCovid reduktojnë mundësinë e infektimit dhe shmangin në shkallë të lartë hospitalizimet dhe fatalitetet. Vaksinimi është i hapur edhe për fëmijët mbi 12 vjeç me probleme të sistemit imunitar, me rekomandim nga mjeku. Gjithashtu ka nisur vaksinimi me dozën e tretë, sipas rekomandimit të mjekut të familjes. Nëse dyshoni se jeni i prekur nga Covid-19 apo keni shenja të sëmundjes, izolohuni menjëherë dhe kontaktoni me mjekun tuaj të familjes për t’u testuar ose telefononi Urgjencën Kombëtare në numrin unik 127.
Në çdo qark të vendit po vijon vaksinimi masiv në pikat e përqëndruara te vaksinimit, në qendrat shëndetësore, poliklinika si dhe nëpërmjet njësive të lëvizshme në komunitet në kuadër të aksionit kombëtar “Derë më derë”. Vaksinimi është i hapur dhe të gjithë qytetarët mbi 16-vjeç , të cilët mund të paraqiten me kartën e identitetit në qendrën e tyre shëndetësore, në poliklinika ose në qendrën më të afërt të vaksinimit, çdo ditë, nga 08:00-20:00, për të kryer vaksinën antiCovid. Deri tani kanë mbërritur në vendin tonë rreth 2.5 milionë vaksina antiCovid. Procesi i vaksinimit po kryhet sipas të gjithë parametrave të sigurisë dhe cilësisë nga ekipe të trajnuar vaksinatorësh në të gjithë vendin.
Vaksinat ndaj Covid-19 ndihmojnë trupat tanë të zhvillojnë imunitet ndaj virusit që shkakton këtë sëmundje pa pasur nevojë të sëmuremi. Lloje të ndryshme të vaksinave funksionojnë në mënyra të ndryshme për të ofruar mbrojtje, por me të gjitha llojet e vaksinave, trupi mbetet me një sasi të limfociteve T të kujtesës si dhe limfociteve B që do të kujtojnë se si të luftojnë atë virus në të ardhmen. Zakonisht duhen disa javë që trupi të prodhojë limfocite T dhe limfocite B pas vaksinimit. Ndonjëherë pas vaksinimit, procesi i krijimit të imunitetit mund të shkaktojë shenja të tilla si ethe etj. Këto shenja janë normale dhe janë një tregues që trupi po përpiqet për të krijuar imunitet.
Shqipëria nisi në datë 11 janar
2021 fushatën e vaksinimit antiCovid nëpërmjet fushatës “Shqipëria Buzëqesh”. Qendra e parë e vaksinimit antiCovid u hap në Tiranë, në Stadiumin ‘Air Albania’, teksa janë hapur edhe shumë pika të tjera vaksinimi në rrethe. Sipas ekspertëve të shëndetit publik, vendi ynë zotëron kapacitetet e zinxhirit ftohës për secilën nga vaksinat që do të vijnë në Shqipëri.
Krahas vaksinimit, ekspertët e shëndetit publik theksojnë se është shumë e rëndësishme që çdo qytetar duhet të vijojë të zbatojë me përpikmëri edhe rregullat për parandalimin e Covid-19: ku nuk duhet të neglizhoni në asnjë moment që të vendosni maskën mbrojtëse në çdo ambient të mbyllur dhe kudo ku nuk mund të ruhet distancimi fizik, si dhe të kujdeseni për higjienën vetjake dhe të vetëizolohuni kur dyshoni se jeni të prekur nga ky virus i rrezikshëm. Deri në vaksinimin e plotë të popullatës, respektimi i këtyre masave është vendimtar në ndihmë të ndërprerjes së zinxhirit të infektimeve me Covid-19.