“Shqipëria e mbuluar nga plehu politikë i prodhuar tri dekadat e fundit”
REAGIMI MBI ATË ÇKA NDODH DHE THUHET NË TIRANË/ “Tezat e tij janë anti-shqiptare, përdoren vetëm nga serbët”/ Kim Mehmeti i kthehet Berishës: S’dua t’i besoj si të vërteta lajmet se Doktori...
Sali Berisha dhe disa mbështetës të tij, prej disa ditësh janë duke akuzuar shqiptarët e Maqedonisë, se i kanë ardhur në ndihmë Lulzim Bashës.
Sipas Berishës dhe njerëzve të tij, bëhet fjalë për një grup të Kumanovës, që janë pjesë e “Vëllazërisë Myslimane”.
Kjo ka sjellë reagimin e ashpër edhe të vetë Kim Mehmetit.
Ai thotë se tezat e Sali Berishës janë antishqiptare dhe ato përdoren vetëm nga serbët.
“Nuk dua t’i besoj si të vërteta lajmet se të afërmit e Doktorit që donë ta rithemelojë PD-në, i paskan ringjallur gënjeshtrat serbe, duke e informuar botën se shqiptarë e Maqedonisë janë ‘vëllazëri myslimane’, nga të cilët duhet mbrojtur Evropën e krishterë!?
Nuk dua ta besoj këtë sepse edhe Doktori, po aq sa edhe unë, e dinë se gjatë themelimit të PD-së, shqiptarët e Maqedonisë, e lanë anësh vetveten, për ta ndihmuar këtë parti dhe demokratizimin e Shqipërisë. Dhe andaj, ndër të tjerat, derdhën drejtë Tiranës para jo me grushte, por me thasë, edhe atë pa pyetur kurrë se kush dhe si ato i harxhoi.
Pastaj nuk dua t’i besoj këto lajme sepse edhe unë edhe Doktori e dimë sa të moçme janë gënjeshtrat antishqiptare të përdorura nga qarqet serbe, të cilat gënjeshtra kanë për qellim ta paralajmërojnë Evropën sa është e “rrezikuar” nga myslimanët e Ballkanit?!
E nëse këto lajme janë të vërteta, atëherë shqiptarëve të Maqedonisë nuk u mbetet asgjë tjetër përpos ta pranojnë se politikanët që e kanë humbur pushtetin mbi vetveten, janë të gatshëm të shkelin edhe mbi kufomat e popullit të vet, vetëm për të ardhur në pushtet.
Siç do duhet të pranojnë se investimi i tyre në PD ka qenë i gabuar, se me atë investim kanë kontribuar që Shqipërinë ta mbulojë plehu politikë i prodhuar tri dekadave të fundit dhe që mëmëdheu, nga diktatura e xhaxhit Enver, të kalojë në ‘Diktaturën e Lekut’, të ‘Rilindjes’ së Piktorit.
Sidoqoftë shqiptarët e Maqedonisë e meritojmë të jetojnë në paqe me vetveten dhe me vëllazërinë shqiptare, sepse mëmëdhe Shqipërisë dhe atdhe Kosovës, u kanë qëndruar pranë në çastet e tyre më të vështira. Edhe atë jo për t’ia larë borxhin shqiptarisë, por për t’i dalë hakut vetvetes.
Dhe nëse është e vërtet se shqiptarëve të Maqedonisë askush nuk ua ka borxh mirënjohjen, atëherë është më se e vërtet se të shkelësh mbi përkatësinë e tyre fetare, edhe atë vetëm për ta shpëtuar karrierën personale politike dhe, vetëm që t’i jargavitesh botës së krishterë, është antishqiptari e neveritshme”, shkruan Mehmeti.
“Sa e turpshme është ajo që ndodh te selia e Partisë Demokratike”
Ndërkohë, ditën e 8 janarit, Kim Mehmeti reagoi serish nëpërmjet një statusi në rrjetet sociale për atë çka ngjau në Selinë e Partisë Demokratike.
“Gabojnë ata që mendojnë se ky turp u takon vetëm atyre që e mbrojnë dhe atyre që duan ta pushtojnë ‘kalanë’ e PD-së!
Jo, ai turp na bie në hise edhe neve që ua humbëm kuptimin fjalëve, ne që kurrë nuk i treguam këtij populli se është në duart e politikanëve që shkelin edhe mbi kufoma, sepse besojnë se janë pronarë të përjetshëm të pushtetit dhe shtetit.
Dhe kur i sheh gjitha ato skena të neveritshme dhe të paimagjinueshme mesjetare që i përdorin ata që e mbrojnë dhe ata që e sulmojnë ‘kështjellën’ e PD-së, nuk mund ta shmangësh pyetjen: si është e mundur që shqiptaria të durojë tërë këtë marrëzi e tërë këtë turp?
Dhe çka do që të ndodh te godina e PDsë, një gjë është e qartë: nga sot e tutje, emblema e kësaj partie do simbolizojë edhe turpin e sotëm! E godina e saj do jetë vend krimi ku ‘ra’ PD-ja, ajo më nuk i takon askujt, ajo është vend ku Shqipëria dhe shqiptaria u përballën me mjerimin e vet politik”.