KLP bën emërime në disa Prokurori, Ibrahimi: Të menaxhohen pasojat e Vettingut!
Mbahet mbledhja e radhës e Këshillit. Miratohet edhe dorëheqja e prokurorit të Vlorës, Maksim Sota, i arrestuar vitin e kaluar në kuadër të një operacioni bashkë me Italinë, kundër një organizate narkotrafiku. Anëtarët shprehin shqetësimin për vakancat dhe ngërçin që ka shkaktuar procesi i Vettingut në Prokurori, pasi 120 magjistratë janë larguar deri tani. ILD kërkon edhe procedim disiplinor për 2 prej prokurorëve
Këshilli i Lartë i Prokurorisë zhvilloi dje mbledhjen plenare të radhës, ku mori dhe disa vendime, mes të cilave janë edhe emërimet e reja në disa institucione të akuzës në vend. Në njoftimin zyrtar theksohet se me votë unanime, Këshilli vendosi caktimin e përkohshëm të irena Çunotit, aktualisht prokurore në Korçë, në Prokurorinë e apelit Korçë, për periudhën katër mujore, janar-prill të këtij viti, si e komanduar. Këshilli vijoi me vendimin për miratimin e raportit për analizimin e aftësive profesionale të subjektit të rivlerësimit, Vitjuna Mata, prokurore në Prokurorinë Vlorë, e cila aktualisht është e komanduar pranë Këshillit të Lartë të Prokurorisë. Kopjet e vendimeve të djeshme do i dërgohen edhe Komisionit të Pavarur të Kualifikimit dhe Operacionit Ndërkombëtar të Monitorimit, që vëzhgojnë dhe kryejnë proceset e Vettingut ndaj magjistratëve.
“Bazuar në kërkesën për dorëheqje nga detyra të Maksim Sotës, prokuror në Prokurorinë Vlorë, paraqitur pranë KLP më datë 13 dhjetor 2021, Këshilli vendosi deklarimin e mbarimit të statusit të magjistratit për shkak dorëheqjeje. dorëheqja jep efekt më datë 31 janar të këtij viti”, thuhet në njoftim. Maksim Sota është prokurori i arrestuar nga SPaK, si i dyshuar për lidhje me një organizatë narkotrafiku që vepronte në aksin Vlorë-itali, ku në bashkëpunim me Antimafian e vendit fqinj, vitin e kaluar u krye një operacion i madh, që çoi në pranga edhe zyrtarë e policë. Sota nuk e ka pranuar asnjëherë akuzën, teksa ehde ndodhet në proces bashkë me të tjerët, kurse së fundmi ka dorëzuar dorëheqjen edhe si magjistrat, teksa po i nënshtrohet Vettingut.
Me propozim të Komisionit për Zhvillimin e Karrierës, Këshilli vendosi me shumicë votash që të transferohet përkohësisht me pëlqimin e tij, Kledian Llaho, prokuror në Prokurorinë Vlorë, në atë të Sarandës, për një periudhë njëvjeçare.
Gjatë diskutimeve, anëtarët prokurorë, Sokol Stojani dhe Zeqir Hoda, kanë ngritur shqetësimin për numrin e vakancave në sistem të shkaktuar nga procesi i Vettingut, i cili ka arritur në 120 prokurorë. Ky fakt e vështirëson ndjeshëm funksiononin e zyrave të Prokurorisë. Për këtë arsye, ata i kërkuan Këshillit, të jetë i kujdesshëm me përdorimin e instrumenteve në dispozicion, si emërimi, caktimi i përkohshëm dhe transferimi i përkohshëm me pëlqim i prokurorëve brenda sistemit të prokurorisë. Kjo, për të mos ndikuar negativisht në punën e prokurorëve dhe në përballimin e ngarkesës, shkaktuar nga numri i madh i dosjeve.
duke ndarë të njëjtin shqetësim, Kryetari i KLP-së, Gent ibrahimi, deklaroi se, “përballë kësaj situate të vështirë, Këshilli ka pasur për detyrë të garantojë funksionalitetin e zyrave të prokurorisë në vend, duke përdorur me efikasitet dhe në mënyrë proporcionale, të vetmet instrumente ligjore që ka në dispozicion, me qëllim menaxhimin e vakumit të madh të krijuar në sistem nga pasojat e Vettingut”.
Me propozim të Komisionit disiplinor, Këshilli caktoi datën 07.02.2022, ora 11.00, si datë për zhvillimin e seancës dëgjimore për procedimin disiplinor në ngarkim të 2 prej magjistratëve prokurorë që janë denoncuar nga iLd apo dhe akuzuar, teksa është propozuar masa disiplinore “vërejtje publike”.