Dje 1697 raste të reja dhe 4 viktima si pasojë e Covid-19
Ndonëse numri i testimeve të kryera gjatë 24 orëve të shkuara ka pësuar rënie, infektimet me koronavirus vijojnë të mbeten të larta. Në të dhënat e raportuara nga autoritetet e shëndetit publik bëhet e ditur se gjatë ditës së djeshme janë konfirmuar 1697 të infektuar të rinj me Covid-19 në të gjithë vendin, teksa kanë ndërruar jetë edhe 4 qytetarë të tjerë në radhët e të moshuarve, të cilët nuk ja dolën dot të fitonin betejën me këtë sëmundje të rrezikshme pavarësisht ndihmës së specializuar mjekësore të marrë në spitalet Covid. Në rritje shfaqet edhe numri i të shtruarve në spitale, tregues ky që po shihet me shumë shqetësim nga bluzat e bardha. Ndërmjet të shtruarve ka edhe të moshave më të reja.
Konkretisht gjatë 24 orëve të shkuara në të gjithë vendin janë kryer 5280 testime, nga të cilat kanë rezultuar pozitivë me koronavirus 1697 qytetarë, në këto bashki: 745 në Tiranë, 89 në Durrës, 86 në Shkodër, 67 në Gjirokastër, 63 në Vlorë, 51 në Elbasan, 45 në Kamëz, nga 44 qytetarë në Lushnje, Fier, 34 në Lezhë, 31 në Berat, 29 në Sarandë, 27 në Mallakastër, 26 në Mat, 25 në Korçë, 24 në Dimal, 23 në Krujë, 20 në Vorë, 18 në Dibër, 15 në Devoll, 13 në Divjakë, nga 11 qytetarë në Delvinë, Kavajë, nga 10 qytetarë në Tepelenë, Kuçovë, Gramsh, nga 9 qytetarë në Roskovec, Kukës, nga 8 qytetarë në Kurbin, Shijak, nga 7 qytetarë në Pogradec, Këlcyrë, nga 6 qytetarë në Himarë, Kolonjë, Prrenjas, nga 5 qytetarë në Librazhd, Përmet, Selenicë, Rrogozhinë, Mirditë, Pukë, Vau i Dejës, nga 4 qytetarë në Tropojë, Peqin, nga 3 qytetarë në Skrapar, Memaliaj, nga 2 qytetarë në Has, Konispol, Maliq, Belsh, nga 1 qytetar në Dropull, Libohovë, Fushë Arrëz.
Janë 21,167 pacientë aktivë me koronavirus në të gjithë vendin, ku aktualisht në spitalet Covidpo marrin trajtim 148 pacientë, nga të cilët 15 janë në gjendje më të rënduar. “Në 24 orët e fundit me gjithë përpjekjet e stafit mjekësor ka katër humbje jete me SARS-COV2 pozitiv: një qytetare nga Elbasani 73 vjeçe, një qytetar nga Shijaku 75 vjeç, dy qytetarë nga Tirana të moshave 78-86 vjeç “, raportoi dje Ministria e Shëndetësisë dhe Mbrojtjes Sociale. Po gjatë kësaj koje janë shëruar 935 qytetarë , duke e çuar numrin e të shëruarve në 208,201 që nga fillimi i epidemisë. Sipas autoriteteve të shëndetit nëse dyshoni se jeni të prekur nga koronavirusi apo keni shenja të sëmundjes, izolohuni menjëherë dhe kontaktoni me mjekun tuaj të familjes për t’u testuar sa më parë ose telefononi Urgjencën Kombëtare në numrin unik 127.
E ndërsa situata mbetet e rënduar, Ministria e Shëndetësisë u bën apel qytetarëve të vaksinohen sa më parë, për të mbrojtur veten dhe shëndetin e të tjerëve. Çdo qytetar mbi 16 vjeç, mund të vaksinohet në qendrën shëndetësore ose në pikën më të afërt të vaksinimit të përqëndruar. Vaksinimi është i hapur edhe për fëmijët mbi 12 vjeç me probleme të sistemit imunitar, me rekomandim nga mjeku. Po ashtu edhe qytetarët që kanë kaluar 6 muaj nga kryerja e dozës së dytë të vaksinës, të drejtohen në qendrat shëndetësore ose pikat e vaksinimit të përqëndruar, për t’u vaksinuar me dozën e tretë përforcuese. sipas tyre, vaksinat antiCOVID reduktojnë mundësinë e infektimit dhe shmangin në shkallë të lartë hospitalizimet dhe fatalitetet. Ministria e Shëndetësisë u kujton qytetarëve se respektimi i protokolleve anticovid është domosdoshmëri për mbrojtjen e shëndetit. Vendosja e maskës është e detyrueshme në çdo ambient të mbyllur. Shmangni grumbullimet dhe ajrosni ambientet ku qëndroni, për të kufizuar përhapjen e Covid-19.