Ish-kryegjyqtarja e Elbasanit ‘falet’ nga iLD, 6 muaj pezullim me rrogë minimale
Enkeleda Kapedani ‘ia hedh’ me një kërkim faljeje gjatë hetimit dhe publikisht, ILD pranon ndjesën dhe e dënon 6 muaj rrogë minimale, sikurse dhe pezullimin që nisi prej muajit qershor 2021, kur u vendos nga ILD. Do pritet nëse do rikthehet në detyrë, apo do ketë tjetër procedim. U publikuan video ku sfilonte në zyrë dhe institucion, si dhe këndonte në makinë hitin “Mafia”. Magjistratja: Do bëhem më e kujdesshme në jetën private, u gjenda nën presion të madh psikologjik. Periudha e pezullimit më shërbeu për të reflektuar thellë
Shpëton me një vërejtjeje dhe me ulje page për gjashtë muaj ish-kryegjyqtarja e Elbasanit, që u bë virale me videot e publikuara në Tik-Tok, ku sfilonte në institucion dhe zyrë, gjatë orarit të punës, apo këndonte hite muzikore si “Mafia”. iLd ka pranuar dje kërkesën e magjistrates së pezulluar, Enkeleda Kapedani, për arritjen e një marrëveshjeje, ku pranonte shkeljen disiplinore që ka kryer, në këmbim të një mase disiplinore më të butë.
iLd thotë se vendosi të pranojë marrëveshjen, bazuar në rrethanat e reja të krijuara: “Magjistratja, ndryshe nga qëndrimi mohues lidhur me shkeljen disiplinore gjatë procedimit fillestar disiplinor, ka marrë përsipër peshën e përgjegjësisë morale, ka kërkuar ndjesë, si dhe ka shfaqur pendesë lidhur me aktet e kryera nga ana e saj”, thuhet në njoftimin zyrtar.
Më datë 5 janar të këtij viti, “dy palët kanë rënë dakord për nënshkrimin e marrëveshjes së përbashkët të pranimit, për caktimin ndaj magjistrates të masës disiplinore “pezullim” me të drejtën për të marrë pagën minimale për një periudhë kohore për 6 muaj”, thuhet në vendim.
“Gjyqtarja ka pohuar se në çastet e para është gjendur përballë një presioni shumë të madh psikologjik, familjar, mediatik dhe institucional, të cilat në tërësinë e tyre ndikuan edhe aftësinë e saj për të përceptuar realitetin dhe mënyrën e reagimit ndaj tij. Magjistratja ka deklaruar se periudha e pezullimit deri më sot i ka shërbyer për të reflektuar thellë rreth situatës dhe të ndjejë një peshë përgjegjësie dhe përgjegjshmërie për atë çfarë ka ndodhur, duke e bërë më të kujdesshme në jetën e saj private”, thotë ILD.
Gjyqtarja e Elbasanit, Enkeleda Kapedani, nuk i përmbajti dot lotët kur diskutohej pezullimi i saj nga detyra nga anëtarët e Këshillit të Lartë Gjyqësor, në qershor të 2021. Ajo qëndroi e pezulluar për këto gjashtë muaj dhe përfundimisht me uljen e pagës. tashmë duket se ky dënim ka përfunduar dhe magjistratja do të kërkojë rikthimin në një detyrë që do i caktohet, ose dhe në atë pozicion ku ishte më herët, si gjyqtare.
“Magjistratja ka qenë bashkëpunuese dhe nuk ka qenë pengesë lidhur me vazhdimin e hetimeve, apo vënien në dispozicion të iLd të mjeteve apo informacionit të nevojshëm», thuhet mes të tjerash në njoftimin e ILD. Paralelisht vijojnë hetimet ndaj saj nëse ka pasur edhe shkelje penale, pasi rasti u trajtua si një cenim i imazhit të magjistratit dhe ulje e figurës, në shpërdorim detyre.
Kapedani mori jo pak vëmendje pas publikimit të videove në tik-tok vitin e kaluar, teksa sfilonte në Gjykatën e Elbasanit, dhe me këngët ‹Mafia Mafia›. Më 7 qershor të vitit të kaluar, KLGJ vendosi pezullimin nga detyra të kryegjyqtares Enkeleda Kapedani, deri në përfundim të hetimeve.