Konservatorja Roberta Metsola, Presidentja e re e Parlamentit Europian

Eurodeputetja Roberta Metsola është zgjedhur presidentja e re e Parlamentit Evuropian. Metsola zëvendëson në këtë post David Sassoli, i cili u nda nga jeta pak ditë më parë. Anëtare e grupit të partive të djathtë EPP, maltezja 42-vjeçare ishte midis katër kandidatëve që garuan për këtë pozicion: Sira Rego nga Spanja, radikale e majtë; polakut Kosma Zlotowski euroskeptik; dhe suedezes Alice Bah Kuhnke nga partia e gjelbër. Metsola është eurodeputete nga viti 2013 dhe zëvendëpresidente e Parlamentit Europian nga viti 2020. Ligjvënësja konservatore kohët e fundit siguroi mbështetje të madhe teksa zëvendësoi Sassolin, i cili për shkak të gjendjes shëndetësore ishte tërhequr më herët nga posti. Nënë e katër fëmijëve, Metsola ka marrë edhe kritika nga disa kolegë lidhur pikëpamjet e saj kundër abortit, që janë shumë të përhapura në Maltë, vendi i fundit i BE ku aborti është ende i ligjshëm.

Studimi në Izrael: Doza e katërt e vaksinës nuk ofron mbrojtje shtesë kundër Omicron

As doza e katërt nuk e ndalon dot infektimin me variantin Omicron. Një studim në Izrael tregoi se doza e dytë përforcuese rrit ndjeshëm nivelet e antitrupave, por jo mjaftueshëm për të parandaluar infektimin me variantin më ngjitës. Qendra mjekësore Sheba në Izrael, u dha një dozë të katërt të vaksinës së Pfizer 154 pjesëtarëve të stafit, ndërsa për 120 të tjerë aplikoi atë të Modernës. Ata u krahasuan me grupin që nuk mori një dozë të dytë përforcuese. Por, edhe pse u vërejt një rritje e konsiderueshme e antitrupave, madje edhe më shumë se pas dozës së tretë, efektshmëria për mbrojtjen nga infektimi mbeti e njëjtë Zbulimet e studimit, që sipas spitalit janë të parat e këtij lloji në botë, janë paraprake dhe nuk janë publikuar ende. Izraeli është vendi me fushatën më të shpejtë të vaksinimit kundër Covid-19 dhe muajin e kaluar nisi të ofrojë dozën e katërt për grupet më të rrezikuara nga virusi.